ქეთა თოფურიამ ზაფხულის ცხელი დღეები ნიცაში გაატარა. როგორც თავად გვითხრა, ეს მოგზაურობა მეუღლის სიურპრიზი იყო. მომღერალი რამდენიმე დღით ალბათ საქართველოსაც ეწვევა, აქტიურ მუსიკალურ ტურნეს კი სხვადასხვა ქვეყანაში, სექტემბრიდან გეგმავს. და ბოლოს, ისიც ცნობილია, რომ სულ მალე ქეთა და მისი რჩეული ქორწილის გადახდას აპირებენ.
- ცოტა ხნის წინ მეუღლემ სიურპრიზი მომიწყო და ნიცაში წამიყვანა. ძალიან მაგარი დრო ვატარეთ. სიურპრიზები, ზღვა, მზე ძალიან მიყვარს. ამჟამად დასვენებას ვერ ვახერხებ, მაგრამ მალე მეუღლესთან ერთად ისევ ვგეგმავ სადმე წასვლას. ოღონდ, არ მკითხოთ, ამჯერად სად წახვალთო? ამას მაინც არ გეტყვით.

- ქეთა, გავრცელდა ინფორმაცია, რომ ქორწილისთვის კაბას იკერავ...

- კი, კაბას მართლა ვიკერავ. ქორწილი სავარაუდოდ, მოსკოვში მექნება, რომელსაც მხოლოდ რამდენიმე ადამიანი დაესწრება. ის ინფორმაცია, რომ გრანდიოზული ქორწილის გადახდას ვგეგმავ - სიცრუეა.

- არ შემიძლია ნინი ბადურაშვილზე არ გკითხო, რომლის მეჯვარეც იყავი. ნინი ცოტა ხნის წინ ქმარს გაშორდა. ეს ფაქტი შენთვის მოულოდნელი იყო?

- ირაკლის ძალიან დიდ პატივს ვცემ, ის ჩემი ყველაზე ახლო მეგობრის მეუღლე იყო. მათი

პირადი ცხოვრება ჩემი საქმე არ არის, მაგრამ მე ამ ყველაფერში არც ნინის და არც მის ოჯახს არ ვამართლებ. თავიდანვე იგრძნობოდა, რომ ადრე თუ გვიან, დაშორდებოდნენ და ამას ყოველთვის ვამბობდი.

- ასე რატომ ფიქრობდი? ერთმანეთი არ უყვარდათ?

- ვფიქრობ, არც ნინის უყვარდა ირაკლი და არც ირაკლის - ნინი. არ შეიძლება, ისეთი სერიოზული გადაწყვეტილება, როგორიც ოჯახის შექმნაა, ასე უცბად და მარტივად მიიღო. გასაგებია, რომ ირაკლის ძალიან შეძლებული და დახვეწილი ოჯახი აქვს, მაგრამ ეს სიყვარულს არ ნიშნავს... მჯერა, ნინის ცხოვრებაში აუცილებლად გამოჩნდება ისეთი პიროვნება, ვისთანაც ახალ ოჯახს შექმნის.

- შენი და შენი მეუღლის ურთიერთობაში, დროის გასვლასთან ერთად, არაფერი შეცვლილა?

- არა. ყველაფერი ისეა, როგორც თავიდან იყო. ძალიან გვინდა, შვილი გვყავდეს და ამაზე ვფიქრობთ. ჯერ ორსულად არ ვარ.

- საქართველოში ჩამოსვლას არ გეგმავთ?

- კი, რამდენიმე დღით დასასვენებლად აუცილებლად ჩამოვალთ.