სათამაშოების სამყაროში რეგულარულად ჩნდება ტენდენციები, რომლებიც სწრაფად იძენს პოპულარობას ბავშვებსა და მოზრდილებში. ბოლო დროს ჰიტია Labubu-ს სათამაშოები, ჩინური კომპანია Pop Mart-ის უჩვეულო კბილებიანი არსება. მათ წარმატებას თან ახლავს არა მხოლოდ აღფრთოვანება, არამედ სკანდალებიც, რომლებიც ეჭვქვეშ აყენებს ბიზნესის მომავალს.

საიდან გაჩნდა „ლაბუბუს“ ფენომენი?

„ლაბუბუს“ სათამაშოები შექმნა ჰონგ-კონგელმა ილუსტრატორმა, კა-სინგ ლუნგმა, რომელიც შთაგონებული იყო სკანდინავიური მითოლოგიით. ჰოლანდიაში გაზრდილ ავტორს სურდა შეექმნა პერსონაჟები, დაბალანსებული უცნაურობასა და მომხიბვლელობას შორის. ასე გაჩნდა ლაბუბუ - სათამაშო დიდი თვალებით, ფართო ღიმილით და ოდნავ შემზარავი გარეგნობით.

„ლაბუბუს“ ნამდვილი გარღვევა 2024 წელს მოხდა, როდესაც K-pop ჯგუფის Blackpink-ის წევრმა, ლისამ და სხვა ცნობილმა ადამიანებმა, როგორიცაა რიანა და დუა ლიპა, თავიანთი ახალი ფავორიტები სოციალურ ქსელებში აჩვენეს. მას შემდეგ, სათამაშო გლობალურ ტრენდად და კოლექციონირების საგნად იქცა.

საინტერესოა, რომ დღეს „ლაბუბუს“ პოპულარობამ ყველა ასაკობრივ ზღვარს გადააჭარბა. დღეს არა მხოლოდ ბავშვები, არამედ მოზრდილებიც აქტიურად ჩაერთნენ ტენდენციაში: ცნობილი სახეები და მოდის ბლოგერები ამ „კბილებიანებს“ ჩანთებისა და ტანსაცმლის ელეგანტურ აქსესუარებად იყენებენ. ზოგიერთი ზრდასრული აღიარებს, რომ შვილებს სათამაშოებს ართმევს, ზოგი კი შეგნებულად ყიდულობს მათ, რათა ხაზი გაუსვას იმიჯის ინდივიდუალობას.

წარმატების საიდუმლო: „ბრმა ყუთების“ მარკეტინგი

Pop Mart-ის გაყიდვებში განსაკუთრებული იყო ე.წ. „ბრმა ყუთები“ - მყიდველმა წინასწარ არ იცის, რომელ სათამაშოს მიიღებს. იშვიათი ეგზემპლარის მიღების შანსი 2%-ზე ნაკლებია, რაც ასტიმულირებს განმეორებით შესყიდვებს და ზრდის აზარტს.

სწორედ ამ მოდელმა გამოიწვია ჩინეთის მედიაში კრიტიკა. გაზეთმა People’s Daily, ჩინეთის კომუნისტური პარტიის ოფიციალურმა ორგანომ, მკაცრად დაგმო კომპანიის ბიზნეს მოდელი, მას „ხაფანგი“ უწოდა და მიუთითა დამოკიდებულების განვითარების რისკზე, განსაკუთრებით ბავშვებში.

აქციების ვარდნა და ბაზრის რეაქციები

კრიტიკული სტატიის გამოქვეყნების შემდეგ, Pop Mart-ის აქციები მკვეთრად, 9%-ით დაეცა, კომპანიის საერთო ზარალმა მოკლე პერიოდში თითქმის 4 მილიარდი დოლარი შეადგინა. ინვესტორები შეშფოთებულნი არიან ჩინეთში სათამაშოების გაყიდვების შესაძლო გამკაცრებული რეგულაციებით. კერძოდ, ხელისუფლებამ უკვე აკრძალა „ბრმა ყუთების“ გაყიდვა 8 წლამდე ასაკის ბავშვებისთვის.

მიუხედავად აქციების ვარდნისა, UBS-ისა და JPMorgan-ის ანალიტიკოსები კვლავ დარწმუნებულნი არიან კომპანიის გრძელვადიან პოტენციალში. თუმცა, ეს ინციდენტი ბაზრისთვის სიგნალი გახდა შესაძლო რისკების შესახებ.

ეთიკურობა და ფსიქოლოგიური ასპექტები

ბევრს მიაჩნია, რომ ასეთი პერსონაჟებით გატაცება შეიძლება სასარგებლო იყოს: ბავშვები სწავლობენ შიშების დაძლევას და უჩვეულოს ტოლერანტულად აღქმას. არიან ისეთებიც, ვინც შეშფოთებას გამოთქვამს ბავშვებზე სათამაშოების ფსიქოლოგიური ზემოქმედების გამო და მოუწოდებენ ამას განსაკუთრებული ყურადღება მიექცეს.

გარდა ამისა, Pop Mart-ის მარკეტინგული სტრატეგია, რომელიც აზარტულ თამაშებსა და კოლექციონირებას ეფუძნება, მშობლებისა და ექსპერტების შეშფოთებას იწვევს. ფსიქიატრები აღნიშნავენ, რომ სათამაშოების პოპულარობის ფენომენი დიდწილად დაკავშირებულია ნოსტალგიასთან და ასაკობრივ რეგრესიასთან, რომელიც დამახასიათებელია ზუმერების თაობისთვის.

Pop Mart-ისა და სათამაშოების ბაზრის მომავალი

„ლაბუბუს“ სიტუაცია ნათლად აჩვენებს, რამდენად სუსტი ზღვარია მოდასა და ეთიკას შორის. სათამაშოს მსოფლიო პოპულარობამ უზრუნველყო კომპანიის წარმოუდგენელი ზრდა და ცნობადობა, თუმცა ახლა მოუწევს რეგულაციურ გამოწვევებთან გამკლავება და გაყიდვების მიდგომაზე გადახედვა.

ანალიტიკოსები პროგნოზირებენ მოკლევადიან სირთულეებს Pop Mart-თვის, თუმცა ჩინეთის ხელისუფლების მიერ ინტელექტუალური საკუთრების განვითარების მხარდაჭერის გათვალისწინებით, კომპანიას შეუძლია წარმატებით მოერგოს ახალ პირობებს. მთავარი კითხვა რჩება, თუ როგორ შეიცვლება აუდიტორიის მოთხოვნები და აღქმა უახლოეს წლებში და შეძლებს თუ არა კომპანია შეინარჩუნოს ბალანსი მომგებიანობასა და სოციალურ პასუხისმგებლობას შორის.

უნდა ინერვიულონ თუ არა მშობლებმა?

Labubu არ არის მხოლოდ ტრენდი, არამედ ფენომენი, რომელმაც მოიტანა ღრმა ცვლილებები სათამაშოების სამყაროში და ზოგადად საზოგადოებაში. მნიშვნელოვანია, რომ მშობლებმა და სპეციალისტებმა გააგრძელონ დიალოგი და ყურადღებით დააკვირდნენ, თუ როგორ მოქმედებს სათამაშოები ბავშვებზე. ამასობაში, კომპანიებს მოუწევთ სერიოზულად დაფიქრდნენ თავიანთ სტრატეგიებზე და მიიღონ ზომები, რომლებიც მათ საშუალებას მისცემს შეინარჩუნონ მომხმარებელთა ნდობა და დააკმაყოფილონ ახალი ეთიკური და მარეგულირებელი სტანდარტები.

ასევე დაგაინტერესებთ:

როგორ გამოიგონა სენდვიჩი აზარტული თამაშების მოყვარულმა გრაფმა?

ცნობილი საღეჭი რეზინა Love is გასაოცარი სიყვარულის წყალობით შეიქმნა

6 წლის ბიჭმა ლონდონის რესტორნისთვის ლოგო შექმნა

გაუმაძღარი ყასაბი ან რატომ ააგო იტალიელმა მსოფლიოში უდიდესი ხორცის საცავი

1600 ევრო და ორი ბოთლი ვისკი - როგორ იყიდა adidas-მა 3 ზოლის უფლება