ღვინის ეკონომისტთა ამერიკულმა ასოციაციამ (AAWE) მსოფლიოში ღვინის მწარმოებელი ქვეყნების რეიტინგი გამოაქვეყნა. ამის შესახებ "ბიზნეს მედია " წერს.

ორგანიზაციის ინფორმაციით, გასულ წელს ყველაზე მეტი ღვინო იტალიამ აწარმოვა -4.4 მილიარდი ლიტრი; მეორე ადგილზე საფრანგეთია 3.6 მილიარდი ლიტრით, ხოლო მესამე ადგილს ესპანეთი იკავებს 3.1 მილიარდი ლიტრით. მეოთხე და მეხუთე ადგილებს არგენტინა 1.1 მილიარდი და ავსტრალია 1 მილიარდი ლიტრით იკავებენ.

ორგანიზაციის სტატისტიკაში საქართველო 236 მილიონი ლიტრით მე-16 ადგილზეა.

საქართველოს ღვინის ეროვნული სააგენტო ქვეყანაში წარმოებული ღვინის შესახებ ინფორმაციას არ აქვეყნებს და ოფიციალური სტატისტიკა მხოლოდ ექსპორტზე გასულ ღვინოს ფარავს. სააგენტოს ინფორმაციით, შარშან საქართველოდან 95 მლნ-მდე ლიტრი ღვინო გავიდა ექსპორტზე, საიდანაც ქვეყანამ 276 მლნ დოლარის შემოსავალი მიიღო.

ღვინის ეკონომისტთა ამერიკული ასოციაცია აერთიანებს ხელისუფლების და ბიზნესსექტორის წარმომადგენლებს, ეკონომისტებსა და მკვლევრებს მსოფლიოს სხვადასხვა ქვეყნიდან. ორგანიზაციის საქმიანობა მოიცავს ღვინის ინდუსტრიის ეკონომიკურ კვლევებსა და ანალიზებს, მათ შორის, მარკეტინგის, მოხმარების, წარმოების თემებზე, ასევე, რეცენზიების მომზადებას მევენახეობასა და მეღვინეობასთან დაკავშირებულ სხვადასხვა თემებზე.