.

კრიპოტოვალუტების ღირებულება რეკორდულად გაიზარდა - ერთი ბიტკოინის საფასური 107 ათას დოლარს აჭარბებს - სწორედ ეს გარემოება მაინინგის, ანუ კრიპტოვალუტების გამომუშავების კომერციულ მიმზიდველობას დამატებით ზრდის.

ამის გათვალისწინებით, საქართველოში არსებულ დატა ცენტრებში მაინინგის საქმიანობა მკვეთრად გაიზარდა. 2025 წლის პირველ 4 თვეში იმ კომპანიებმა, რომლებიც ელექტროენერგიის პირდაპირი მომხმარებლები არიან და რომელთა საქმიანობაც კრიპტო მოპოვებასთან არის დაკავშირებული, მოხმარებული ელექტროენერგიის მოცულობა წლიურად შვიდჯერ გაზარდეს.

.

უფრო კონკრეტულად, 2025 წლის ოთხ თვეში, ამ კომპანიებმა ჯამში 246.7 მილიონი კილოვატ საათი ელექტროენერგია მოიხმარეს, რაც წლიურად 7.5-ჯერ გაზრდილი მაჩვენებელია. ეს მთლიანად საქართველოს ელექტრომოხმარების 5% იყო.

აღნიშნული კომპანიები ძირითადად თბილისისა და ქუთაისის თიზ-ებში არიან რეგისტრირებული, რადგან აღნიშნულ ზონებში ელექტროენერგიის მიწოდება დღგ-ს გადასახადისგან არის გათავისუფლებული.

.

კომპანიების მიხედვით, მოხმარებული ელექტროენერგიის მოცულობის მხრივ პირველ ადგილზეა შპს ეიაიტექ სოლუშენი, რომელმაც 100.5 მილიონი კილოვატ საათი ელექტროენერგია მოიხმარა. კომპანია ოპერირებს თბილისში, გლდანის დატა ცენტრში, სადაც წარსულში Bitfury ახორციელებდა მაინინგს.

.

ელექტროენერგიის მოხმარებით მეორე ადგილზეა კომპანია შპს თი ეფ ზი სერვისის, რომელმაც 64.9 მილიონი კილოვატ საათი ელექტროენერგია მოიხმარა. თავის მხრივ, ეს კომპანია მაინინგით არ არის დაკავებული, თუმცა თიზ-ში არსებული სხვა მაინინგ კომპანიებისთვის ახდენს ელექტროენერგიის მიწოდებას.

.

49.5 მილიონი კილოვატ საათი ელექტროენერგია მოიხმარა კომპანია ტექსპრინტ კორპორეიშენმა, აითილების მოხმარება 24.6 მილიონი კილოვატ საათი იყო, ხოლო კომპანია დატა ჰაბის მოხმარება კი 7.2 მილიონი კილოვატ საათი.

.

მნიშვნელოვანია გარემოება, რომ 2024 წელს საქართველოში სასერვერო აპარატურის იმპორტი მკვეთრად გაიზარდა და მან 115 მილიონი დოლარი შეადგინა, მაშინ როდესაც ბოლო 5 წელში ამ საქონლის იმპორტი საშუალოდ 30 მილიონი დოლარი იყო. ესეც სავარაუდოდ ქვეყანაში მაინინგის სფეროს გააქტიურებასთან არის დაკავშირებული.