8 ივნისს დაბადებიდან 105 წელი შეუსრულდა, ლეგენდარულ უკრაინელ მფრინავს ივან კოჟედუბს, მეორე მსოფლიო ომის ყველაზე წარმატებულ მებრძოლს.

საყოველთაოდ აღიარებული 60-ზე მეტი ინდივიდუალური გამარჯვებით, ივან კოჟედუბი ითვლება მეორე მსოფლიო ომის დროს ყველაზე წარმატებულ საბჭოთა და მოკავშირე მებრძოლ პილოტად. კოჟედუბი არის იმ მცირერიცხოვან პილოტთა შორის, რომლებმაც დადასტურებულად ჩამოაგდეს Messerschmitt 262 რეაქტიული თვითმფრინავი და პირველი საბჭოთა პილოტი, ვინც ეს შეძლო. იგი სამჯერ გახდა საბჭოთა კავშირის გმირი.

კოჟედუბი დაიბადა 1920 წლის 8 ივნისს უკრაინულ ოჯახში სოფელ ობრაჟიიევკაში, ჩერნიგოვის გუბერნიაში, რომელიც ამჟამად მდებარეობს უკრაინის სუმის ოლქის შოსტკის რაიონში. 1934 წელს მშობლიურ ქალაქში სკოლის მეშვიდე კლასის დამთავრების შემდეგ, მან გააგრძელა სწავლა კიდევ ორი წელი შოსტკაში. იქ იგი თავდაპირველად ბიბლიოთეკარად მუშაობდა სკოლის მეცხრე კლასის დასრულებამდე 1936 წელს, და ამ წლიდან 1940 წლამდე სწავლობდა შოსტკის ქიმიური ტექნოლოგიების კოლეჯში. სწავლასთან ერთად, იგი ესწრებოდა წვრთნებს ადგილობრივ აეროკლუბში, რომელიც დაამთავრა 1939 წელს. შემდგომში იგი შეუერთდა წითელ არმიას 1940 წლის თებერვალში და 1941 წლის იანვარში დაამთავრა წვრთნა ჩუჰუივის სამხედრო საავიაციო პილოტების სკოლაში, სადაც თავდაპირველად ისწავლა UT-2, UTI-4 და I-16 თვითმფრინავების პილოტირება. იგი დარჩა სკოლაში ფრენის ინსტრუქტორად და განაგრძო პილოტების წვრთნა მას შემდეგაც, რაც სკოლა იძულებული გახდა ევაკუირებულიყო შიმკენტში 1941 წლის შემოდგომაზე გერმანიის მიერ საბჭოთა კავშირის დაპყრობის გამო. იგი გაგზავნეს მოსკოვში 1942 წლის ნოემბერში, სადაც მიავლინეს 240-ე მებრძოლ საავიაციო პოლკში, მაგრამ ფრონტზე მხოლოდ 1943 წლის მარტში ჩავიდა, როდესაც 302-ე მებრძოლი საავიაციო დივიზია გაგზავნეს ვორონეჟის ფრონტზე.

უპირატესობას ანიჭებდა მოკლე, ინტენსიურ შეტევებს მტრის თვითმფრინავების გასაოგნებლად და ჩამოსაგდებად, ერთ-ერთი საყვარელი ტექნიკა, რომელიც მან შეიმუშავა და გამოიყენა ომის დროს, მოიცავდა სამიზნეზე ქვევიდან სწრაფად მიახლოებას და შემდეგ ცეცხლის გახსნას მხოლოდ უკიდურესად ახლო მანძილიდან. კოჟედუბი ძალიან წარმატებით იყენებდა ამ ტაქტიკას პიკირებადი ბომბდამშენის

Junkers Ju 87 წინააღმდეგ, რამაც მას დაუმარცხებელი 18 ჩამოგდება მოუტანა (არსენი ვოროჟეიკინის მსგავსად). თუმცა, ეს მანევრი ძალიან სარისკო იყო მიუხედავად იმისა, რომ ომის განმავლობაში არასდროს ჩამოუგდიათ, კოჟედუბს ჰქონდა რამდენიმე მჭიდრო შეხება, თუმცა დაზიანების მიუხედავად, მან ყოველთვის შეძლო თავისი თვითმფრინავის დასმა.

1945 წლის თებერვლის შუა რიცხვებში, თავის La-7-ით თავისუფალი ნადირობის მისიის დროს ფრანკფურტის სამხრეთით, თავის მეწყვილე დიმიტრი ტიტარენკოსთან ერთად, კოჟედუბმა ჩამოაგდო სრულიად ახალი ხილი და სენსაცია ავიაციამრეწველობაში-რეაქტიული თვითმფრინავი-Messerschmitt 262 რითაც ის გახდა პირველი საბჭოთა პილოტი, ვინც ეს შეძლო.

ფოტოზე: ივან კოჟედუბის La-7 მონინოს ავიაციის მუზეუმში

ომის ბოლოსთვის კოჟედუბმა განახორციელა 330 გაფრენა, მონაწილეობა მიიღო 120 საჰაერო ბრძოლაში და ჩამოაგდო 64 მტრის თვითმფრინავი.ყველა თავისი საჰაერო გამარჯვება მან მოიპოვა La-5F, La-5FN და La-7-ზე, გამოხატა თავისი დიდი უპირატესობა "ლავოჩკინის" გამანადგურებლების მიმართ და შეხვდა სემიონ ლავოჩკინს, რათა კომენტარი გაეკეთებინა გამანადგურებლების დიზაინის სხვადასხვა ასპექტზე.ამ დროისთის ის უკვე სამგზის საბჭოთა კავშირის გმირის წოდება ჰქონდა მინიჭებული

ომის შემდგომ მან განაგრძო სამსახური საჰაერო ძალებში. 1949 წელს დაამთავრა წითელი დროშის სამხედრო-საჰაერო ძალების აკადემია. ამავდროულად, ის დარჩა აქტიურ პილოტად, 1948 წელს ერთ-ერთი პირველი დაეუფლა რეაქტიულ MiG-15-ის მართვას.

კორეის ომის დროს, 1951 წლის აპრილიდან 1952 წლის იანვრამდე, იგი მეთაურობდა 324-ე ავიაგამანადგურებელთა დივიზიას. ამ დროის განმავლობაში, დივიზიის პილოტებმა მოიპოვეს 216 საჰაერო გამარჯვება, დაკარგეს მხოლოდ 27 თვითმფრინავი (9 პილოტი დაიღუპა). კორეაში საბჭოთა სამხედრო სპეციალისტების ჯგუფის შემადგენლობაში საბრძოლო მოქმედებების დროს მისი მეტსახელი იყო - „კრილოვი“.

1956 წელს დაამთავრა კ. ე. ვოროშილოვის სახელობის უმაღლესი სამხედრო აკადემია. 1962 წლის ივნისიდან 1963 წლის აგვისტომდე - იყო 76-ე საჰაერო არმიის მეთაური. ​​1964-1971 წლებში - მოსკოვის სამხედრო ოლქის საჰაერო ძალების მეთაურის მოადგილე. 1971 წლიდან მსახურობდა საჰაერო ძალების ცენტრალურ აპარატში, ხოლო 1978 წლიდან - სსრკ თავდაცვის სამინისტროს გენერალური ინსპექტორების ჯგუფში. 1970 წელს მიენიჭა ავიაციის გენერალ-პოლკოვნიკის წოდება, ხოლო 1985 წელს - ავიაციის მარშალის.

იგი აირჩიეს სსრკ II-V მოწვევების უმაღლესი საბჭოს დეპუტატად და სსრკ სახალხო დეპუტატად.

გარდაიცვალა 1991 წლის 8 აგვისტოს. დაკრძალულია მოსკოვში, ნოვოდევიჩის სასაფლაოზე.

ივან კოჟედუბზე გამოცემულია რამდენიმე წიგნი(მათ შორის ავტობიოგრაფიული) და გადაღებულია დოკ.ფილმი "ივან კოჟედუბის ორი ომი"