ამერიკელ ქალს ავტომობილის გადაცემათა კოლოფის გადამრთველი აერია და საკუთარი 10 თვის ვაჟი გაჭყლიტა, ამის შესახებ გამოცემა People წერს.

აშშ-ში ნიუ-ჯერსის შტატში მცხოვრებ ახალგაზრდა ქალს მანქანაში გადაცემათა კოლოფის ბერკეტი აერია და მცირეწლოვან შვილს სასიკვდილოდ დაეჯახა.

ინციდენტი 17 მაისს, ოუშენის ოლქში მოხდა. 30 წლის ვენდი კასტილიო-ტორესი საკუთარ ეზოში მანქანებს რეცხავდა. რეცხვის პროცესში საკუთარი 10 თვის ჩვილი ბავშვის შეზლონგში მოათავსა რომელიც ორ მანქანას შორის იდგა. გარეცხვის შემდეგ, ქალმა გადაწყვიტა, ერთ-ერთი მანქანა გაეყვანა, თუმცა სიჩქარის კოლოფის გადამრთველი არასწორ პოზიციაზე დააყენა. უკან სვლის ნაცვლად, სიჩქარის ბერკეტი წინ სვლაზე გადართო..

მანქანა შეზლონგს შეეჯახა, რომელშიც ბავშვი იმყოფებოდა და მეორე მანქანას მიაჭყლიტა. კასტილიო-ტორესმა მაშინვე მოახერხა მანქანის უკუსვლაზე გადაყვანა და დაძვრა, მაგრამ უკვე გვიანი იყო.

ადგილზე მისულმა მაშველებმა დაშავებული პატარა საავადმყოფოში გადაიყვანეს, თუმცა ექიმებმა მისი გადარჩენა ვერ შეძლეს.

ტრაგედიის შემდეგ გაირკვა, რომ კასტილიო-ტორესს მოქმედი მართვის მოწმობა არ ჰქონდა. შედეგად, ამერიკელ ქალს შვილის სიკვდილში ბრალი წაუყენეს.

„გამოძიებით დგინდება, რომ ეს ტრაგიკული შემთხვევა იყო, - განაცხადა ადგილობრივმა პოლიციის ოფიცერმა. -ამ დროს ჩვენი ფიქრები და ლოცვები ოჯახთანაა.“

ქალს ბრალი წაუყენეს, თუმცა არ დაუკავებიათ. მას სასამართლოში პირადად გამოცხადება დაევალა.