ჩინეთმა ოფიციალურად ჩაუშვა მსოფლიოში პირველი 10G ფართოზოლოვანი ქსელი სიონგანში, ქალაქში, რომელიც ნულიდან აშენდა, რათა მომავლის ტექნოლოგიების ცენტრი ყოფილიყო და რომელიც ამჟამად პლანეტაზე შესაძლოა ყველაზე სწრაფი ინტერნეტის მქონე დასახლებული პუნქტი გახდეს.

Huawei-სა და China Unicom-ის კოლაბორაციით შემუშავებული ქსელი იყენებს 50G-PON ტექნოლოგიას, რათა უზრუნველყოს ჩამოტვირთვის სიჩქარე წამში დაუჯერებელ 10 გიგაბაიტამდე.

ეს სიჩქარე საკმარისია 8K ვიდეოს სტრიმინგისთვის, ქლაუდ თამაშების მხარდაჭერისთვის თითქმის ნულოვანი შეფერხებით და ისეთი ახალი აპლიკაციების უზრუნველსაყოფად, როგორიცაა ჭკვიანი ქალაქის ინფრასტრუქტურა, ხელოვნური ინტელექტი და AR/VR რეალობა.

სიონგანი, რომელიც პეკინიდან დაახლოებით 70 მილის დაშორებით მდებარეობს, დაპროექტდა, როგორც „ჭკვიანი ქალაქის“ მოდელი, რომლის ძირითადი პრინციპი მდგრადობა და ეფექტურობაა, მათ შორის „ცხოვრების 15-წუთიანი წრის“ კონცეფციაც - სადაც ყოველდღიური საჭიროებები ფეხით სავალ მანძილზეა ხელმისაწვდომი.

თუმცა, 100 მილიარდ დოლარზე მეტი ინვესტიციებისა და უპრეცედენტო სახელმწიფო მხარდაჭერის მიუხედავად, ქალაქს ხშირად „ქალაქ-მოჩვენებასაც“ უწოდებენ კერძო სექტორის იმპულსის ნაკლებობისა და მწირი საცხოვრებელი ფართების გამო.

ჩინეთში 10G ფართოზოლოვანი ინტერნეტის დანერგვა არამხოლოდ ციფრული ინფრასტრუქტურის სფეროში კომუნისტური რეჟიმის ამბიციებს უსვამს ხაზს, არამედ კითხვებს ბადებს იმასთან დაკავშირებითაც, ნამდვილად მოიპოვებს თუ არა პოპულარობას სიონგანის მსგავსი ქალაქების ფუტურისტული ხედვა.

მაშინ, როცა მსოფლიოს უმეტეს ნაწილს 5G-ის დანერგვაც კი არ დაუმთავრებია, როგორც ჩანს, ჩინეთი წინ მიიწევს - სულ მცირე, სიჩქარის თვალსაზრისით მაინც. ახლა ძირითადი გამოწვევა რეალურ სამყაროში ამ კავშირის დანერგვა და შესაბამისი ინფრასტრუქტურის მოწყობაა.

ისიც საკითხავია, რად გინდა 10G ტექნოლოგიები, თუ რაც შენ გსურს, იმას ვერც ილაპარაკებ და ვერც კიდევ - ინტერნეტიდან ჩამოწერ: ჩინეთში ხომ დემოკრატია არ არსებობს და ყველაფერი მკაცრ ცენზურას ექვემდებარება.

ისე, მაინც ძალიან საინტერესოა, 10G კავშირზე რას იტყოდნენ ის ტიპები, რომლებიც ჯერ კიდევ რამდენიმე წლის წინ სატელეკომუნიკაციო მოწყობილობებს ანგრევდნენ და აქციებს აქციებზე მართავდნენ, 5G ინტერნეტი გაგვრყვნისო? საინტერესოა, სად არიან და რას ფიქრობენ ამ ყოველივეზე.