ტანში ჟრუანტელი და შიშის უიმედო შეგრძნება. ბნელი შენობა, სასაფლაოთი გარშემორტყმული, ჭრიალა იატაკი, სიცივე. შედიხართ შიგნით და ხედავთ მოჩვენებებს - თეთრი, მოციმციმე ფიგურები ნახევრად ბნელ ეკლესიაში, რომლებმაც შეავსეს მთელი სივრცე შესასვლელიდან საკურთხევლამდე. ისინი სხედან სკამებზე, დგანან დერეფანში, კედლებთან, ამბიონთან. სახეების ნაცვლად შავი უძირო ხვრელები გიყურებენ. ეკლესიაში სიჩუმე სუფევს, მაგრამ ის უფრო ხმამაღალია, ვიდრე ყველაზე ძლიერი აფეთქების ხმა.

1352 წელს აშენებული წმინდა გიორგის ეკლესია ჩეხეთის სოფელ ლუკოვაში 1960-იანი წლებიდან მიტოვებულია.

ეკლესიის გაპარტახების მიზეზი გახდა სახურავის ჩამონგრევა ერთ-ერთ დაკრძალვის ცერემონიის დროს. სარემონტო სახსრები არ ჰქონდათ, ხოლო ადგილობრივმა მცხოვრებლებმა გულწრფელად დაიჯერეს, რომ წმინდა ადგილი დაწყევლილია. მას შემდეგ შენობაში მხოლოდ რამდენიმე ადამიანს თუ შეუხედავს.

ძველი ისტორიული შენობის მიმართ ყურადღების მისაქცევად ადგილობრივმა მხატვარმა იაკუბ ჰადრავამ ნანგრევები ხელოვნების ნიმუშად აქცია. ახლა მრევლისთვის განკუთვნილ სკამებზე მდუმარე, უძრავი თეთრი სილუეტები სხედან.

ფიგურები გამოსახავენ სუდეტელი გერმანელების მოჩვენებებს, რომლებიც მეორე მსოფლიო ომის დროს ცხოვრობდნენ ამ სოფელში და ყოველ კვირას დადიოდნენ ამ ეკლესიაში. ამ ნამუშევრით ჰადრავას სურს აჩვენოს მსოფლიოს, რომ ამ ადგილს აქვს ისტორია, რომელსაც დიდ გავლენა ახდენს ადამიანებზე.

სულები ერთდროულად საშიში და მომხიბვლელია.

თეთრი მოჩვენებების წყალობით ეკლესია პოპულარული გახდა არა მხოლოდ ადგილობრივ მოსახლეობაში, არამედ ტურისტებშიც. ექსკურსიებიდან შემოსული თანხით ეკლესიას გაარემონტებენ. ჯერჯერობით არავინ იცის, დარჩება თუ არა მოჩვენებები ეკლესიის რესტავრაციის შემდეგ თუ სამუდამოდ გაქრება.

ასევე დაგაინტერესებთ:

ვატიკანის სამოციქულო არქივი - რა საიდუმლოებები იმალება მის კედლებში?

მსოფლიოს 22 უნიკალური ტაძარი სუნთქვისშემკვრელი არქიტექტურით

იცუკუსიმა – წმინდა კუნძული, სადაც აკრძალულია დაბადება და სიკვდილი

როგორ იპოვეს წამოწოლილი ბუდას უზარმაზარი ქანდაკება, რომელიც ოდესღაც გაუვალ ჯუნგლებში იყო დამალული

ამ ინდური ტაძრის კედლები ათასობით სკულპტურისგან შედგება