ორშაბათის კატასტროფული მიწისძვრის შედეგად დაღუპულთა რიცხვმა 7800-ს გადააჭარბა. ბრძოლა გადარჩენილთა საძებნად გრძელდება, ასობით ათასი თავშესაფარს ეძებს.

"გარდიან"-ის ცნობით, დადასტურებულია, რომ თურქეთში დაიღუპა 5, 894 ადამიანი, ხოლო სირიაში - 1, 932 ადამიანი, ჯამში 7, 826 ადამიანია დაღუპული უკანასკნელი მონაცემებით. არსებობს შიში, რომ დაღუპულთა რიცხვი განუწყვეტლივ გაიზრდება, ჯანდაცვის მსოფლიო ორგანიზაციის ოფიციალური პირების შეფასებით, შესაძლოა 20 000-მდე გაიზარდოს დაღუპულთა რაოდენობა.

თურქი მეკარე აჰმედ ეიუპ თურქასლანი (28 წლის) გარდაიცვალა ორშაბათს მომხდარი მიწისძვრის შედეგად, რაც მისმა კლუბმა "იენი მალატიასპორ"-მა დაადასტურა.

დახმარება იგზავნება მსოფლიოს სხვადასხვა ქვეყნიდან. საქართველოდან მაშველთა ჯგუფი ერთ-ერთი პირველი დაიძრა უბედურების ზონის მიმართულებით.

ერთ-ერთი თვითმხილველი ბურსადან დახმარებას ითხოვს ინფორმაციის გავრცელების გზით. ჰუსეინ ორალოღლუ, მოგზაური (როგორც თავად უწოდებს თავს), სოციალურ ქსელში წერს: "გულუხვი დონორების საყურადღებოდ, ვისაც სურს დაეხმაროს თურქეთის 10 ქალაქში მომხდარი მიწისძვრით დაზარალებულებს, მიწისძვრის ზონაში ელექტროენერგია გათიშულია. მათ სჭირდებათ გენერატორები. უსარგებლოა გამათბობლების გაგზავნა ელექტროენერგიის გარეშე დარჩენილ პროვინციებში.

აშშ-ს გეოლოგიური სამსახურის ცნობით, 7, 8 მაგნიტუდის მიწისძვრა ადგილობრივი დროით 04:17 საათზე (01:17 GMT) დაფიქსირდა 17, 9 კმ სიღრმეზე (11 მილი) ქალაქ გაზიანტეპთან.

სეისმოლოგების თქმით, პირველი მიწისძვრა ერთ-ერთი ყველაზე დიდი იყო, რაც კი ოდესმე დაფიქსირებულა თურქეთში. გადარჩენილების თქმით, რყევის შეჩერებას ორი წუთი დასჭირდა.

მეორე მიწისძვრა - პირველის მიერ გამოწვეული - 7, 5 მაგნიტუდის სიმძლავრის იყო და მისი ეპიცენტრი კაჰრამანმარას პროვინციის ელბისტანის რაიონში იყო.

ინციდენტის შემდეგ არაერთი ე.წ. აფტერშოკი დაფიქსირდა, განმეორებითი ბიძგები კვლავაც იგრძნობა რეგიონის მასშტაბით.