ამერიკის შეერთებული შტატების აერონავტიკის და კოსმოსური კვლევების ეროვნული სააგენტოს (NASA) მიერ მარსისკენ გაშვებულმა ზონდმა, რომლის სახელწოდება Mars Reconnaissance Orbiter-ია, წითელი პლანეტის მრავალ რეგიონში დიდძალი რაოდენობით ოპალი აღმოაჩინა, რაც უკვე თამამად შეიძლება ჩაითვალოს წლის ერთ-ერთ უმნიშვნელოვანეს აღმოჩენად.

შეგახსენებთ, რომ ოპალი ერთ-ერთი უძვირფასესი მინერალია. მისი ერთი გრამის ყველაზე მინიმალური საერთაშორისო ფასი 60 დოლარიდან იწყება და ხარისხის მიხედვით 36 ათას დოლარამდეც კი აღწევს. ეს მინერალი ჩნდება მაშინ, როცა ვულკანური პროცესის შედეგად წარმოქმნილი ქვა წყალთან შედის კონტაქტში. აღმოჩენა იმას ამტკიცებს, რომ მარსის ზედაპირზე წყალი 1 მილიარდი წლით უფრო დიდხანს არსებობდა, ვიდრე ეს აქამდე იყო ნავარაუდევი. ამის შესახებ მეცნიერები ჟურნალ Geology-ში წერენ.

ანუ როგორც ჩანს, მარსზე წყალი 2 მილიარდი წლის წინათაც არსებობდა. ამაზე მიუთითებს წითელი პლანეტის ზედაპირიდან არეკლილი მზის შუქის სპექტროსკოპიური ანალიზი, რომელიც ჯონ ჰოპკინსის უნივერსიტეტის მკვლევარებმა შეისწავლეს და სადაც გარკვევით ჩანს ოპალის კვალი.

აქამდე მეცნიერები მარსის ზედაპირზე წყლის შემცველ მხოლოდ ორ მინერალს იცნობდნენ - ფენურ სილიკატს და ჰიდრატიზირებულ სულფატს. მაგრამ საქმე იმაშია, რომ ეს მინერალები დაახლოებით 3 მილიარდი წლის წინ წარმოიშვა. ოპალის აღმოჩენა კი ამ თარიღს დაახლოებით 1 მილიარდი წლით ახანგრძლივებს. ასევე ეს აღმოჩენა იმასაც ამტკიცებს, რომ მარსზე წყალი საკმარისად დიდხანს იყო საიმისოდ, რათა იქ ქვათა სტრუქტურა შეეცვალა.

ოპალით მდიდარი რეგიონების აღმოჩენა იმითაც არის განსაკუთრებით მნიშვნელოვანი, რომ სწორედ იქ, სადაც ეს უძვირფასესი მინერალი აღმოაჩინეს, დიდი ალბათობით შესაძლოა სიცოცხლის ნაშთებიც არსებობდეს.

ასე და ამგვარად, უკვე დაზუსტებით ცნობილია ის რეგიონები, სადაც მარსზე გაგზავნილ პირველ ექსპედიციაში შემავალი ასტრონავტები სიცოცხლის ნიშნების ძებნას დაიწყებენ.