საშინელ ოჯახურ ბიზნესს მართავდა მეგან ჰესი

Sunset Mesa Funeral Home-ის მფლობელი ქალაქ მონტროზში, კოლორადოს შტატში გარდაცვლილის უნუგეშო ნათესავებისგან ცხედრის კრემაციისთვის ათას დოლარს იღებდა. თვითონ კი, მათგან ფარულად, ყიდდა გვამების ხელებს, ფეხებს, თავებს, ხერხემლებს.

ალბათ იკითხავთ ვის სჭირდებოდა ასეთი კონკრეტული პროდუქტიო?გვამების ნაწილებს ყიდულობდნენ სამედიცინო ორგანიზაციები, სამედიცინო საგანმანათლებლო დაწესებულებები ექსპერიმენტებისთვის, იგივე ქირურგების მოსამზადებლად. მყიდველები არც დაეჭვებულან, რომ "საქონელი" კრიმინალური გზით იყო მოპოვებული, რადგან ჰესი მიცვალებულთა სხეულის ნაწილებს ფიქტიურად გაფორმებულ დოკუმენტებზე ყიდდა მისივე სხვა კომპანიის Donor Services-ის მეშვეობით, რომელიც იმავე შენობაში მდებარეობდა, სადაც დაკრძაალავი ბიურო იყო განთავსებული.

დანაწევრებას ასრულებდა დედა შირლი კოხი. ზოგჯერ ოჯახი მეცნიერებისთვის მთელ გვამებს ყიდდა.

კოშმარული ბიზნესი 2010 წლიდან 2018 წლამდე გრძელდებოდა, რომელსაც წერტილი დაუსვა Reuters-ის ჟურნალისტურმა გამოძიებამ. ამის შემდეგ საქმე FBI-მ გადაიბარა.

დადასტურდა, რომ წლების განმავლობაში ქალიშვილმა და დედამ უკანონოდ დაანაწევრეს და ნაწილ-ნაწილ გაყიდეს 550-ზე მეტი გვამი! 200-ზე მეტმა ოჯახმა მიიღო ურნები, სადაც მათი საყვარელი ადამიანების ფერფლთან ერთად სხვა მიცვალებულთა ფერფლს ურევდნენ.

„ეს ორი ქალი სარგებლობდა მსხვერპლთა მოწყვლადი გრძნობებით, რომლებიც მიმართავდნენ მათ გლოვისა დამწუხარების მომენტში“, - განუცხადა FBI-ს აგენტმა ლეონარდ კაროლომ სასამართლოს. „ამ ადამიანების მხარდაჭერის ნაცვლად, ეს ხარბი ქალებატონები ბოროტად იყენებდნენ ასობით მსხვერპლის ნდობას და მათი ნათესავების სხეულებს ასახიჩრებდნენ“.

3 იანვარს განაჩენი გამოცხადდა. 46 წლის მეგან ჰესს, კოშმარული ბიზნესის მფლობელს, 20 წლით თავისუფლების აღკვეთა მიესაჯა. სასამართლომ არ გაითვალისწინა ადვოკატების არგუმენტები, რომ 18 წლის ასაკში მეგანს ტვინის ტრავმული დაზიანება ჰქონდა, რის გამოც აქედან გამომდინარე ჰქონდა „უცნაურობა“ გვამებთან. მის 69 წლის დედას შირლი კოხს 15 წლით თავისუფლების აღკვეთა მიუსაჯეს.