ჟენევის უნივერსიტეტის არქეოლოგებმა საბერძნეთში გემის ჩაძირვის ადგილზე ნახევარღმერთ ჰერაკლეს (ბერძნული მითოლოგიის მიხედვით, ღვთაებრივი გმირი. ზევსის და ალკმენეს ვაჟი, პერსევსის შვილთაშვილი.) ქანდაკების მარმარილოს თავი აღმოაჩინეს. ამ დროისთვის, ამ ლოკაციის საფუძვლიანი შესწავლა მიმდინარეობს, იტყობინება გაზეთი The Guardian.
გარდა ამისა, ზღვის ფსკერზე, შლამში აღმოაჩინეს ადამიანის ორი კბილი. მეცნიერებმა უნდა გაარკვიონ ვის ეკუთვნოდნენ ისინი. თავისა და კბილების გარდა, მკვლევართა ხელშია გემის ზოგიერთი ნაწილი, ლითონის ლურსმნები და ღუზის ფრაგმენტები.
კვლევა ჩატარდა 23 მაისიდან 15 ივნისის ჩათვლით. მყვინთავებმა, შვეიცარიული კომპანიის Hublot Xplorations group -ის აღჭურვილობის გამოყენებით, გადააჩოჩეს მრავალტონიანი ნამსხვრევები ახალი ადგილების გამოსაკვლევად. ექსპედიციას ხელმძღვანელობდა არქეოლოგი ლორენც ბაუმერი.
