სხვა 5 პასუხი 5 მარტივ კითხვაზე, რომლის დასმაც ყოველთვის გერიდებოდათ 2022, 29 აპრილი, 15:31
ინტერნეტის შექმნამ კიდევ უფრო მარტივი გახადა ნებისმიერ კითხვაზე პასუხის წამებში მიღება. ადამიანები როგორც წესი, ცნობილი სელებრითების ასაკისა თუ მათი დაბადების თარიღის გარდა, ასევე ყველაზე ხშირად ინფორმაციას სამეცნიერო ფაქტებისა და ჯანმრთელობის პრობლემების გამომწვევ მიზეზებზე ეძებენ, თუმცა მათ შორის არის ისეთი კითხვებიც რომელთა დასმაც ადამიანებში გარკვეულ უხერხულობის გრძნობას იწვევს. მაგალითად, იცით რატომ არის დუნდულები მრგვალი ფორმის? ან რატომ არსებობს ღარი ზედა ტუჩსა და ცხვირს შორის? ან ის თუ იცით, რატომ კბენს კოღო ზოგიერთ ადამიანს სხვებზე უფრო მეტად? როგორც გაირკვა ინტერნეტმომხმარებლის მხრიდან ყველაზე ხშირად დასმულ კითხვებს შორის სწორედ ზემოაღნიშნული კითხვებიც აღმოჩნდა, რომლებიც უპასუხოდ "მსოფლიო-ქსელს" ნამდვილად არ დარჩენია!
1. რატომ აქვთ ადამიანებს სხვადასხვა ფერის თვალები?
ამ მდგომარეობას ჰეტეროქრომიას უწოდებენ
ეს ძალიან დიდ იშვიათობას წარმოადგენს. "ყველაზე ლამაზ დაავადებად" წოდებული თვალის ფერადი გარსის სხვადასხვა უბნების არაერთგვაროვანი შეფერილობა მხოლოდ 1000 ამერიკელიდან 11-ს თუ აღენიშნება.
მსგავსი ფენომენი შესაძლოა მელანინის ნაკლებობის ან პირიქით, მისი სიჭარბის შედეგად იყოს განპირობებული. მთელმა რიგმა ფაქტორებმა კი შეიძლება სრული ჰეტეროქრომიაც კი გამოიწვიოს. ეს მდგომარეობა როგორც წესი, ერთი თაობიდან მეორეს გადაეცემა.
მეცნიერთა აზრით, ამ დაავადების ყველაზე გავრცელებული მიზეზი გენეტიკური მრავალფეროვნების არარსებობაა. გენური მუტაციები, რომლებიც მელანინის სწორ განაწილებას განსაზღვრავენ, შეიძლება ქრომოსომული ერთგვაროვნების შედეგად დაზიანდნენ.
2. რატომ არის დუნდულები მრგვალი ფორმის?
ზოგიერთი ადამიანი მხოლოდ იმით არის შეპყრობილი რომ საკუთარ დუნდულებს მადისაღმძვრელი ფორმები რაც შეიძლება ხანგრძლივად შეუნარჩუნოს, მაგრამ ნუთუ არასდროს დაფიქრებულხართ რატომ არის დუნდულები მრგვალი ფორმის?
მრგვალი დუნდულები სწორედ ევოლუციის პროცესის შედეგია. გამომდინარე იქიდან რომ ჩვენი წინაპრები მონადირეები იყვნენ, მათ საკვების მოსაპოვებლად ნადირობა მთელი სიცოცხლის განმავლობაში უწევდათ.
ასე რომ, კუნთების ფორმირება საკმაოდ ბუნებრივად მოხდა. მრგვალი ფორმა ასევე ხელს უწყობს სხეულის სწორი მდგომარეობის შენარჩუნებასაც.
3. რატომ არის ღარი ზედა ტუჩსა და ცხვირს შორის?
ამ ღარს - ფილტრუმი ეწოდება. ის ჯერ კიდევ დედის საშვილოსნოში სახის ფორმირების შედეგად ჩნდება. ამ დროს სახის სხვადასხვა ნაწილი ჯერ კიდევ ერთ მთლიანობას წარმოადგენს.
ზოგჯერ ზედა ტუჩის შერწყმა არ ხდება, რის შედეგადაც სასის ნაპრალი წარმოიქმნება.
4. რატომ ნაოჭდება თითები წყალში?
ხელების კანი დაფარულია სებუმით - ცხიმოვანი ჯირკვლების სეკრეტით, რომელიც ხელებს ტენიანობას უნარჩუნებს და მის გარე ფენას იცავს. დანაოჭებული თითები ვეგეტატიური ნერვული სისტემის რეაქციის შედეგია.
როდესაც თითები დიდი ხნის განმავლობაში წყალშია, მათი ზედაპირიდან ცხიმი ირეცხება
ზოგიერთის აზრით, ნაოჭების გაჩენა იმის შედეგია, რომ კანი წყლით იჟღინთება. მეცნიერების ნაწილის თქმით, ნაოჭები სწორედ იმისთვის არსებობს, რომ ხელების დანესტიანების შემთხვევაში თითის ანაბეჭდები შენარჩუნდეს.
5. რატომ კბენს კოღო ზოგიერთ ადამიანს სხვებზე უფრო მეტად?
ალბათ, არაერთხელ დაფიქრებულხართ რატომ ხდება ისე რომ ოთახში თქვენს გვერდით მყოფ მეგობარს თქვენგან განსხვავებით კოღო არასდროს კბენს? როგორც ჩანს, ეს მწერები თავიანთ "მსხვერპლს" რამდენიმე ფაქტორის მიხედვით არჩევენ. მათ არჩევანზე შეიძლება გავლენა იქონიოს ადამიანის ასაკმა, ჩვევებმა, ჩაცმულობამ, სისხლის ჯგუფმა და იმან, თუ რას სვამს ის. კოღოებს უფრო მეტად ის ადამიანები იზიდავთ, ვისაც სისხლის პირველი ჯგუფი აქვს. ცნობილია, რომ კოღოები პოტენციურ "მსხვერპლად" აქტიურ ადამიანებს ირჩევენ, ვინაიდან მათ ოფლი და სითბო განსაკუთრებით მოსწონთ.
გარდა ამისა, ეს მწერები ირჩევენ მათ, ვინც როგორც წესი, მუქი ფერის სამოსს ატარებს, და ბოლოს, უფრო სავარაუდოა რომ კოღო საკუთარ სამიზნედ სწორედ იმ ადამიანს შეარჩევს, ვისაც ლუდის მირთმევა განსაკუთრებით უყვარს.
|