თბილისის მერის, კახაკა ლაძის თქმით, რუსების საქართველოში შემოსვლა პრობლემას არ წარმოადგენს.

"არანაირ პრობლემას არ წარმოადგენს ის, რომ ადამიანები გამორბიან და არ მოსწონთ იქ არსებული მდგომარეობა, სიტუაცია. ვფიქრობ, ვინც ნორმალურად აზროვნებს, რა თქმა უნდა, არ უნდა იყოს მოსაწონი, როდესაც თავისი ქვეყანა უცხო ქვეყანაში იჭრება და იწყებს საომარ მოქმედებებს. ნორმალურია ეს ყველაფერი და არანაირ პრობლემას არ წარმოადგენს".

რუსეთ-უკრაინის ომის შედეგად, საქართველობაში თანდათან რუსები იმკვიდრებენ თავს. თბილისის საერთაშორისო აეროპორტში ბოლო დღეებისა და კვირის განმავლობაში ყველაზე მეტმა რეისმა რუსეთის მოქალაქეები ჩამოიყვანა. მოდიან ბავშვებით, მოაქვთ დიდი რაოდენობით ბარგი. კამერებთან ბევრი მათგანი ამბობს, რომ კონკრეტული გეგმები არ აქვთ და ერთადერთი, რაც იციან არის ის, რომ საკუთარ ქვეყანაში დიდი ხანი არ დაბრუნდებიან.