წარმოშობით უკრაინელმა მომღერალმა ვერა ბრეჟნევამ კარიერა რუსეთში ააწყო, მაგრამ უკრაინასთან კონფლიქტის შემდეგ, რომელიც მომღერალმა და მისმა მეუღლემ, კონსტანტინ მელაძემ დაგმეს, მომღერალმა დატოვა ქვეყანა და მისი ზუსტი ადგილსამყოფელი უცნობი იყო.

ცოტა ხნის წინ კი ბრეჟნევამ თავის ინსტაგრამზე დაწერა, რომ ამჟამად პოლონეთში მოხალისეობით არის დაკავებული: ის ეხმარება უკრაინელ ლტოლვილებს. მომღერალმა რამდენიმე სიუჟეტი გამოაქვეყნა იმ საწყობიდან, სადაც ჰუმანიტარული დახმარება ნაწილდება. ბრეჟნევამ ასევე აღნიშნა, რომ მისი ქალიშვილიც მასთან ერთად იყო.
მომღერალს სამომავლო გეგმები ჯერ არ გაუმხელია. ბევრი ცნობილი სახე, რუსიც და უკრაინელიც, “სამხედრო სპეცოპერაციის" დაწყების შემდეგ საზღვარგარეთ წავიდა.