მას შემდეგ, რაც საინფორმაციო არხებზე უკრაინაში რუსული ჯარების შესვლის კადრები გავრცელდა, სოციალურ მედიაში ხანგრძლივი ანიმაციური კომედიის „სიმფსონების“ ერთგულმა მაყურებლებმა 1998 წლის ეპიზოდი გაიხსენეს, რომელიც დღევანდელ მდგომარეობას ესადაგება.

პირველი პოსტი ამ თემასთან დაკავშირებით თავად „სიმფსონების“ მთავარ პროდუსერს, ანიმატორსა და სცენარისტს, ალ ჟანს ეკუთვნის, რომელშიც სამწუხარო მსგავსება აღნიშნა და Twitter-ზე დაწერა: „ძალიან სამწუხაროა იმის თქმა, რომ ამის პროგნოზირება რთული არ იყო“.

მოგვიანებით, ჟანმა The Hollywood Reporter-თან ინტერვიუში თავისი პოსტი განავრცო: "მეზიზღება ამის თქმა, მაგრამ მე დავიბადე 1961 წელს, ასე რომ, ჩემი ცხოვრების 30 წელი საბჭოთა კავშირის აჩრდილთან ერთად გავატარე. შესაბამისად, ჩემთვის, სამწუხაროდ, ეს უფრო ნორმაა, ვიდრე წინასწარმეტყველება. ჩვენ უბრალოდ მივხვდით, რომ ყველაფერი ცუდად წავიდოდა."

”ისტორიული აგრესია არასოდეს ქრება და თქვენ უნდა იყოთ სუპერ ფხიზლად”, - ამბობს ჟანი. „1998 წელს, როდესაც ეს ეპიზოდი გავიდა ეთერში, შესაძლოა ითქვას, რომ მაშინ იყო აშშ-რუსეთის ურთიერთობების ზენიტი. მაგრამ მას შემდეგ, რაც რუსეთის პრეზიდენტი ვლადიმერ პუტინი გამოჩნდა ასპარეზზე, თითქმის ყველა მიხვდა, რომ ის ცუდი ბიჭია და ცუდი რამ მოხდებოდა. არის ისეთი პროგნოზი, სადაც ჩვენ მივუთითებთ იმას, რაც მოხდა და განმეორდება - ვიმედოვნებთ, რომ ასე არ მოხდება, მაგრამ სამწუხაროდ, ასე ხდება“.

ჟანმა ასევე განაცხადა, რომ მაყურებელი არ უნდა ელოდოს, რომ მომავალ ეპიზოდებში იქნება მინიშნებები რუსეთ-უკრაინის მიმდინარე კონფლიქტზე. შოუს ჩანაწერის გათვალისწინებით, სამართლიანია ვივარაუდოთ, რომ ის, რაც გამოჩნდება 2022 წლის ეპიზოდებში, აქტუალური იქნება 2042 წლისთვის.