მიუხედავად იმისა, რომ წაღვერი ყველასათვის კარგად ნაცნობი კურორტია, ცოტამ თუ იცის იმ ღირსშესანიშნაობის შესახებ, რომელიც არაერთხელ უნახავს და გაუვლია მასზე. წაღვერი კლიმატურ-ბალნეოლოგიური კურორტია. მოიპოვება მინერალური წყლები. დაბა წაღვერი, ბორჯომიდან სამხრეთ-აღმოსავლეთით 20 კმ-ში, თრიალეთის ქედის ჩრდილოეთ კალთაზე. დაბა გარშემორტყმულია მაღალი მთებით, რომლებიც დაფარულია წიწვოვანი ტყეებით.მისი ბუნებრივი სამკურნალო ფაქტორებია გარდამავალი კლიმატი დაბლობსა და მაღალმთიან კლიმატს შორის, ზომიერად ტენიანი სუფთა ჰაერი გაჟღენთილი წიწვოვანი მცენარეების სურნელით და სხვადასხვა მინერალებით მდიდარი სამკურნალო წყლები. წაღვერი ბავშვთა კურორტია, მაგრამ ასევე სასარგებლოა მათთვის, ვინც ზოგადი ჯანმრთელობის გამო ვერ ეგუება მაღალმთიან კლიმატს.

ეგრეთ წოდებული ეიფელის ხიდი, აგებული ბორჯომი-ბაკურიანის ვიწროლიანდაგზე, საოცარ შთაბეჭდილებას ტოვებს მნახველზე. იგი საფრანგეთში შეუკვეთა მიხეილ რომანოვმა, ფრანგმა ინჟინერმა-დიზაინერმა და ხიდების მშენებელმა, პარიზის ცნობილი "ეიფელის კოშკის" ავტორმა ალექსანდრე გუსტავ ეიფელმა კი იგი დააპროექტა. ხიდის მშენებლობა დაიწყო 1897 წელს მდინარე ცემისწყალზე. ხიდი ადგილზე დაამონტაჟა დიზაინერმა ბესარიონ ქებურიამ. 1902 წლის იანვრიდან პირველი ”კუკუშკა” მატარებელი გავიდა ბორჯომი-ბაკურიანის ვიწროლიანდაგიანი რკინიგზით. "კუკუშკა" დღემდე ემსახურება თხილამურების მოყვარულებს და ტურისტებს.

მიუხედავად იმისა, რომ ჩვენი ხიდი არ არის ისეთივე პოპულარული და ვერ იზიდავს იმდენსავე ტურისტს როგორც ეიფელის კოშკი, მაგრამ ფაქტია, რომ ორივე ნაგებობა ერთი და იგივე ადამიანის მიერ არის დაპროექტებული.