ლადო მხეიძე - უნიჭიერესი მხატვარი, იოგას ინსტრუქტორი, რომელიც თავისი ჩაცმულობით, ორიენტაციით და ცხოვრების წესით ციციკორეებს აღიზიანებს. არადა, ლადო ძალიან გულიანი და ერთგული მეგობარი და ძალიან კარგი შვილია. ვისაც ასეთი ადამიანები გაღიზიანებთ

ყველაზე საინტერესო ისაა, რომ მისი ფოტოების ქვეშ სწორედ ისინი აფრქვევენ აგრესიას, ვინც შეუმდგარია, ხელმოცარული, არც სიყვარულში გაუმართლა, არც პროფესიაში, არც ადამიანობაში და ასეთი ფრუსტრაციის ფონზე აგრესია დაუგროვდა. ლორენცისა და ფროიდის აგრესიის ჰიდრავლიკურ თეორიას ვინც იცნობთ, გეცოდინებათ, აკუმულირებული აგრესია რა ფორმით ინთხევა ხოლმე საზოგადოებაში.


ლოგიკურად რომ მივყვეთ, რაღაც ფოტო ან ვიდეო ჩნდება, რომლის პირველივე კადრი გაღიზიანებს, რატომ არ უნდა აუარო გვერდიდა იგნორირება მოახდინო? მხოლოდ იმიტომ, რომ თვითონ ხარ დაინტერესებული ან სულ მცირე, მაზოხისტი, რომ უყურო იმას, რაც გაღიზიანებს და ნერვებს გიშლის. მერე კი ამოიღო თუ ვინმესგან რაიმე ნეგატივი დაგიგროვდა და მიაყარო წყევლა-კრულვად და გინებებად მას, ვისაც არაფერი დაუშავებია გარდა იმისა, რომ საკუთარ ცხოვრებაზე საუბრობს და საკუთარი მსოფლმხედველობით ცხოვრობს.


ეს არ არის ჭორაობა, ეს მეცნიერებაა, ექსპერიმენტებია, რომ ამა თუ იმ პოზიციის ყველაზე გულმოდგინე ოპონენტები არიან ისინი, ვინც ყოველთვის ძალიან ახლოს იყვნენ ამ პოზიციასთან.

ჩემთვის ავტორიტეტული პროფესორის, ჩარლზ რაიტ მილსის ექსპერიმენტების მიხედვით, ადამიანი, რომელიც ყველაზე მეტად ესხმის თავს სექსუალურ უმცირესობებს, სწორედ ის ადამიანია, ვინც ძალიან მიდრეკილი იყო მსგავსი ქცევისკენ და ვინც "სახიფათოდ ახლოს მივიდა ამ ცდუნებასთან". ამასთან, ადამიანი, რომელსაც ეშინია, რომ შეიძლება სექსუალურად მიმზიდველი იყოს თავისივე სქესის ადამიანისთვის, უფრო მიდრეკილია ჰომოსექსუალური დამოკიდებულების განვითარებისკენ“

პროფესორ ჰენრი ადამსისექპერიმენტიც მოიძიეთ.

ამ ძალიან საინტერესო და ბევრისთვის შოკისმომგვრელი ექსპერიმენტის შინაარსს აქ ვერ დავწერ რიგი მიზეზების გამო.

ამიტომ, ვინც გაწიწმატებული თუ აროხროხებული აგინებს, ლანძღავს, დასცინის და განიკითხავს ლადოს, ექსპერიმენტები ასაბუთებს, რომ ასე მათი ქვეცნობიერი მუშაობს და ეს მათივე თვითგამართლებაა საკუთარ თავებთან.

დაკვირვებებმა აჩვენა, რომ ყველაზე გარყვნილები, თან ჩუმი გარყვნილები მორალისტები არიან! ზნეობრივი ადამიანები ისეთ სიბინძურეებსაც არ წერენ მათზე, ვინც ან რაც არ მოწონთ და არ ციციკოროობენ.


ლადოს აქტივობებს თუ გონების თვალით დავაკვირდებით, მივხვდებით, რომ ეს არის პროტესტი ამ საზოგადოების მიმართ, ზოგადად, ზიზღის მიმართ, და სხვების სურვილებსა და ატიტუდებში ცხვირჩაყოფის მიმართ! თუ არ გაღიზიანდებით, საერთოდაც არ ექნება ასეთი მწვავე პროტესტი. მანამდე კი ჰყავს აუდიტორია და ერთობა, იღებს ნახვებს და ა.შ. წარმოიდგინეთ, ზუსტად ასეთი კაბები რომ მდედრობითი სქესის ახალგაზრდამ ჩაიცვას, რამდენი ნახვა ექნება? ნ უ ლ ი.

ყველა ადამიანი დამოუკიდებელი და თავისუფალია საკუთარ არჩევანში და ჩვენ ყველა ვალდებულნი ვართ, პატივი ვცეთ ისეთებს, როგორებიც არიან.

საზოგადოების გარკვეული ნაწილი ზიზღით და სტიგმით მხოლოდ საკუთარ მდარე ინტელექტს და პიროვნულ სისუტეს აჩვენებს საზოგადოებას, თორემ ბუნებამ ადამიანიც და ყველა სხვა ცოცხალი არსება ისეთი შექმნა, როგორნიც არიან და ყველა ერთმანეთისაგან განსხვავდება სწორედ იმიტომ, რომ ეს არის ბუნების სილამაზე და მრავალფეროვნება, რაც მალე გაიაზრებენ ამას ადამიანები, მით უფრო ლამაზი იქნება ცხოვრება ზიზღის გარეშე. გადარჩენილია თვით ლეონარდო ვინჩიც კი, რომელიც დღევანდელ საქართველოში არ დაიბადა! გამოღეჭავდნენ მძულვარებით, მისი ზენიჭიერების, ზეუცნაურობებისა და სექსუალური ორიენტაციის გამო...
ჯენიფერ ენისტონი ლადო მხეიძის მიერ დახატულ საკუთარ პორტრეტთან დაკავშირებით

ზოგს ჰგონია, რომ ვგიჟდებით, ისე მოგვწონს ასეთი არჩევანი, ვინც ასეთი ადამიანების მიმართ ეპმათიას გამოვხატავთ ზიზღით სავსე კომენტარების საპასუხოდ. რაც უფრო ებრძვიან და თათხავენ ასეთებს, მით უფრო მძაფრდება ემპათია მათ მიმართ და ადვოკატირების სურვილი. ანუ ვისაც არ უნდა მსგავსი ადამიანების სიმრავლე საზოგადოებაში და ამას აგრესიით გამოხატავს, უფრო მეტ გულშემატკივარს უჩენს მათ, რადგან ბრძოლა ბრძოლას წარმოშობს, წინააღმდეგობა - წინააღმდეგობას, აგრესია - აგრესიას!


მე მტკივა ლადოს არჩევანი, მაგრამ ზუსტად ამდენივე ხარისხით მტკივა ის საშინელი რეპლიკები მის მიმართ, რომელსაც ადგილი აქვს ვითომ ძალიან მორალური ადამიანებისგან. ნუ გგონიათ, რომსხვისი ლანძღვით, სხვის გვამზე შედგომით ამაღლდებით. პირიქით, ზემონახსენები ექსპერიმენტებით დასკვნებს გაგვაკეთებინებთ, რომ არაფრით ხართ განსხვავებულები ლადოსგან, უბრალოდ ხმამაღლა გეშინიათ ამის გამოხატვა!