უკრაინის რეფორმების ეროვნული საბჭოს აღმასრულებელი კომიტეტის ხელმძღვანელის, მიხეილ სააკაშვილის განცხადებით, უკრაინის საგადასახადო, სასამართლო და საბაჟო სისტემები რეფორმირებას საჭიროებს. ინფორმაციას ამის შესახებ უკრაინული მედია ავრცელებს.

სააკაშვილის თქმით, საბაჟო კორუფციისგან უნდა გათავისუფლდეს, როგორც ეს საქართველოში მოხდა, სადაც საბაჟო სამსახური ყველა საერთაშორისო ორგანიზაციამ „საუკეთესოდ აღიარა“.

„რადიკალურ ცვლილებებს საჭიროებს სასამართლო სისტემა. უკრაინაში სამართლიანობა არ არსებობს, ვინაიდან არ გვაქვს სამართლიანი სასამართლოები. ყველაფერი რადიკალურად უნდა შეიცვალოს, რამდენიმე კვირის განმავლობაში ჩვენ ამის კონცეფციას წარვადგენთ“, - განაცხადა სააკაშვილმა.

მისივე თქმით, ცვლილებები შეეხება საგადასახადო სფეროსაც.

„უნდა გაუქმდეს საშემოსავლო გადასახადი და დაწესდეს გადასახადი ქვეყნიდან გაყვანილ კაპიტალზე. კიდევ ერთი წინადადება ითვალისწინებს საპროცესო შეთანხმებებს პროკურატურასა და იმ პირებს შორის, რომლებმაც სახელმწიფოს ფული მოპარეს - თუ ისინი ფულს ბიუჯეტში დააბრუნებენ, ციხეში ჯდომა არ მოუწევთ. ამ გზით საქართველოს ბიუჯეტში 2 მილიარდი დოლარი დავაბრუნეთ“, - განაცხადა სააკაშვილმა.