მსოფლიო მოდის ისტორიაში, პირველი სუპერმოდელის – ვერუშკა ფონ ლენდორფის (ვერა გოტლიბ ანა ფონ ლენდორფ-შტანიორტი) ბედი მეტად უცნაურად ვითარდებოდა. მის ცხოვრებაში იყო დიდი წარმატება და დიდი ჩავარდნები. ისეთი, რომ მან თავის თავზე გამოსცადა სრული სიღარიბე, ზღაპრული სიმდიდრე და ფუფუნება. ის იყო გერმანელი არისტოკრატი, ბავშობაში საკონცენტრაციო ბანაკშიც მოხვდა, მაგრამ ის არა მარტო გადარჩა, დიდი წარმატებასაც მიაღწია – მსოფლიოს პირველი სუპერმოდელი გახდა.

ის 1939 წ. კენიგსბერგში (ამჟამად – კალინინგრადი) დაიბადა, არისტოკრატის ოჯახში. ლენდორფები უდიდეს სასახლეში ცხოვრობდნენ, რომელშიც 100 ოთახი იყო. მომავალი მოდელის მამამ ბევრი რამ გააკეთა იმისთვის, რომ ჰიტლერი ხელისუფლებაში მოსულიყო. მაგრამ ერთხელ, ის ებრაელი ბავშვების მკვლელობის მოწმე გახდა, რამაც აიძულა თავისი შეხედულებები გადაეხედა და ოპოზიციაში გადავიდა. ის ანტიფაშისტი გახდა და 1944 წ. ჰიტლერზე თავდასხმის ოპერაციის მომზადებაშიც კი მონაწილეობდა. ამის გამო, სიკვდილით დასაჯეს, მისი ცოლი დააპატიმრეს, ხოლო ქალიშვილი ბავშვთა საკონცენტრაციო ბანაკში გაუშვეს. სადაც ის II მსოფლიო ომის დასრულებამდე იყო.

ომის შემდეგ, ვერა სახვით ხელოვნებას სწავლობდა ჯერ ჰამბურგში, შემდეგ ფლორენციაში. იქ მან ფოტოგრაფი უგო მულასო გაიცნო და მოდელად დაიწყო მუშაობა. მოგვიანებით, საფრანგეთში ის ეილინ ფორდს – პრესტიჟულ სამოდელო სააგენტოს უფროსს შეხვდა, რომელმაც სამუშაო აშშ-ში შესთავაზა.

ამერიკაში, მას განსაკუთრებული წარმატებისთვის არ მიუღწევია, ამიტომ გერმანიაში დაბრუნება და იმიჯის შეცვლა გადაწყვიტა. ყურადღების მისაქცევად, სახელი შეიცვალა და ფსევდონიმად ვერუშკა აიღო. მას ტანთ ყველაფერი შავი ემოსა, რაც გასული საუკუნის 60-იანებში არამოდური იყო.

1966 წელს მან ეპიზოდური როლი შეასრულა მიქელანჯელო ანტონიონის ფილმში «Blow up» («ფოტოგადიდება»), რომელმაც არნახული პოპულარობა მოუტანა.

ამ ფილმის შემდეგ, მის ცხოვრებაში ახალი ეტაპი დაიწყო. ის ცნობილ მხატვრებთან მუშაობდა, მათ შორის სალვადორ დალისთანაც. იმ პერიოდში, დღეში 10 ათას დოლარს გამოიმუშავებდა. ვერუშკა არა მარტო ყველაზე მაღალი (186 სმ.), არამედ ყველაზე ტიტულირებული სუპერმოდელი იყო, რომელის ფოტოსურათი 800-ჯერ მოხვდა «Vogue» -ს და სხვა ჟურნალების წინაყდაზე.

1975 წელს ვერუშკამ უეცრად გადაწყვიტა მოდელის კარიერის დასრულება, იმის გამო, რომ კონფლიქტი მოუვიდა ჟურნალ «Vogue»-ს მთავარ რედაქტორთან. 1985 წ. ის დაბრუნდა და მონაწილეობა მიიღო ბოდი-არტის შოუში. მხატვარ-ავანგარდისტების ფოტოსესიებში ის გარდაიქმნებოდა ეგზოტიკურ ცხოველებად, ქვად, ხედ, ჟანგიან მილად...

ამჟამად ვერუშკა ამერიკის შეერთებულ შტატებში ცხოვრობს და პერიოდულად მონაწილეობს გადაღებებში და ჩვენებებზე, როგორც მიწვეული მოდელი.