საზოგადოება გიორგი კვირიკაშვილის წარსული და ოჯახი - რა გზა გაიარა უკვე ყოფილმა პრემიერ-მინისტრმა? 2018, 14 ივნისი, 23:20 გიორგი კვირიკაშვილი დაიბადა 1967 წლის 20 ივლისს, თბილისში. დაამთავრა "კომაროვის" სკოლა. შემდეგ სწავლობდა თბილისის სახელმწიფო სამედიცინო უნივერსიტეტში, რომელიც 1992 წელს დაამთავრა, თუმცა მედიცინისადმი ინტერესი გაუნელდა, ამიტომ ეკონომიკის ფაკულტეტზე ჩააბარა თბილისის სახელმწიფო უნივერსიტეტში, რომელიც 1995 წელს დაამთავრა. შემდეგ სწავლობდა ილინოისის უნივერსიტეტში, სადაც 1998 წელს მაგისტრის ხარისხი მიიღო ფინანსებში. 1993-1996წწ. იყო "გაერთიანებული ქართული ბანკის" კრედიტივების ოფიცერი, საკრედიტო დეპარტამენტის უფროსის მოადგილე; 1996-1997წწ. "ექსპორტ-იმპორტ" ბანკის ვიცე-პრეზიდენტი; 1998-1999წწ. "გაერთიანებული ქართული ბანკი", ფილიალების მართვის დეპარტამენტის დირექტორი; 1999 წელს სახელმწიფო კანცელარია - ფისკალური, ფულად-საკრედიტო და საგარეო-ეკონომიკური ურთიერთობების სამსახურის უფროსის მოადგილე, საქართველოს მთავრობისა და USAID-ის ერთობლივი პროგრამის მცირე და საშუალო ბიზნესის განვითარების ჯგუფის ხელმძღვანელი; 1999-2004 წლებში იყო საქართველოს პარლამენტის წევრი. 2000 წელს გამოეყო მოქალაქეთა კავშირს სხვა ადამიანების ჯგუფთან ერთად და იყო გახდა ფრაქცია " ახალი მემარჯვენეების" ერთ-ერთი დამფუძნებელი. 2001-2002 წლებში საქართველოს ტექნიკურ უნივერსიტეტში მიჰყავდა კორპორატიული ფინანსების სალექციო კურსი. 2004-2006წწ. იყო პირველი კომერციული ბანკის, აღმასრულებელი მენეჯმენტის კონსულტანტი; 2006-2011წწ. ბანკი "ქართუ"-ს გენერალური დირექტორი; 2012-2015წწ. საქართველოს ეკონომიკისა და მდგრადი განვითარების მინისტრი; საქართველოს საგარეო საქმეთა მინისტრი 2015 წლის სექტემბრიდან დეკემბრამდე, ვიცე-პრემიერი 2013-2015 წლებში; 2015 წლის 30 დეკემბრიდან 2018 წლის 13 ივნისამდე იყო საქართველოს პრემიერ-მინისტრი. რაც შეეხება ოჯახს, მეუღლე, მაია (მაკა) ცინაძე პროფესიით ექიმია. ერთმანეთი სამედიცინო უნივერსიტეტში სწავლის დროს გაიცნეს, ჯგუფელები იყვნენ. 1990 წელს დაქორწინდნენ. მათ ოთხი შვილი ჰყავთ - ანა, ნინო, გიორგი და ნიკოლოზ კვირიკაშვილები. მის მეუღლეს არასოდეს უმუშავია და მთელ დროს შვილების აღზრდას ახარჯავს. საზოგადოებაში გამოჩენა არ უყვარს. იგი ხშირად არის დაკავებული ქველმოქმედებით, მაგრამ ამის აფიშირებას ერიდება. ხშირად სტუმრობს მძიმე სენით დაავადებულ ბავშვთა სახლებს. 139 2-ს მოსწონს
|