სოციალურ ქსელ“ფეისბუქში“ გასულ წელს, ოქტომბერში, ზოგიერთმა ინტენეტგამოცემამ გაავრცელა დეზინფორმაცია იმის შესახებ, რომ თურქეთში, ქალაქ სტამბოლში, საქართველოს მოქალაქე ქურთუკის ქურდობისთვის მოკლეს. ეს გამოცემებია: digest.pia.ge, alia.ge, geonews.ge, geomediapress.ge, cyc.ge, ასევე npa.ge. აღსანიშნავია, რომ ხსენებული სააგენტოები საკმაოდ ხშირად ავლენენ ანტითურქულ განწყობას. ინფორმაცია გარდაცვლილი ქართველის შესახებ ეფუძნება მოძრაობა “ქართულ მარშთან“ დაახლოებული პირის, ლევან ხიდიშელის“ მიერ გამოქვეყნებულ სტატუსს სოციალურ ქსელში ჰათშეგით: “თურქეთი მტერია“.

მედიის განვითარების ფონდის პროექტის ფარგლებში შექმნილი გამოცემა “მითების დეტექტორი“ წერს, რომ ფოტოზე ასახულია ეთნიკურად თურქი მამაკაცი, რომელიც სასტუმრო “Ozsa“-ს მესამე სართულიდან გადმოხტა და, რომელსაც ფსიქოლოგიური პრობლემები ჰქონდა. გავრცელებული ინფორმაცია თურქეთში მოკლული ქართველის შესახებ უარყო, როგორც თურქეთის საელჩომ, ისე სასტუმროს ადმინისტრაციამ და ხაზგასმით აღნიშნეს, რომ ფოტოზე თურქეთის მოქალაქე იყო ასახული და არა ნაცემი ქართველი. მოგვიანებით ლევან ხიდიშელმა სტატუსი წაშალა, თუმცა სიახლე სწრაფად გავრცელდა და არაერთი სიძულვილისშემცველი კომენტარი მოჰყვა ზოგადად თურქი ხალხის მისამართით.

მივიწყებული დეზინფორმაცია რადმდენიმე დღის წინ “გააცოცხლა“ და ხელახლა გამოაქვეყნა რუსული წარმოშობის სააგენტომ სახელად -“ Geowebs.ru“, რითიც კიდევ ერთხელ შეძლო ანტითურქული “ისტერიის“ გამოწვევა სოციალურ ქსელში და ფესიბუქმომხმარებელთა გარკვეული ნაწილის გაღიზიანება სიცრუის ტირაჟირების გზით. ცალსახაა, რომ, მსგავსი გამოცემების საშუალებით, მიმდინარეობს არცთუ წარუმატებელი ანტითურქული პროპაგანდა და გარკვეული ძალები მიზანმიმართულად ცდილობენ საქართველოში ანტითურქული განწყობის შექმნას. ასევე ყურადღებას იპყობს ის ფაქტიც, რომ აღნიშნული საიტები იშვიათად, შეიძლება ითქვას, თითქმის არასდროს არ უთმობენ დროს რუსეთის ქმედებებს ქვეყნის ოკუპირებულ ნაწილში.