მტვერსასრუტს, როგორც წესი, რამდენიმე აქსესუარი მოყვება და ანოტაციაც, სადაც მათი დანიშნულების შესახებ შეგიძლიათ წაიკითხოთ, მაგრამ როგორც წესი, უმრავლესობა ამ ინსტრუქციას არ კითხულობს ან პირდაპირ ნაგავში ისვრის, შემდეგ კი მიდის მკითხაობა, თუ რისთვისაა საჭირო ესა თუ ის აქსესუარი და რომლით უნდა გაიწმინდოს მაგალითად-რბილი ავეჯი.

ჭერისა და მაღალი საგნების გასაწმენდად

ეს აქსესუარები მტვერსასრუტის მილის დასაგრძელებლადაა განკუთვნილი და მათი დანიშნულებაც გასაგებია: მტვრის მოშორება მაღალი ავეჯის თავიდან, ან ჭერის პლინტუსებიდან. გარდა ამისა, გამოგადგებათ ავეჯის უკნიდან ან ძნელად მისადგომი ადგილებიდან მტვრის ასაღებად.

რბილი ავეჯის, მატრასების და ბალიშების გასაწმენდად

ნუ შეგაშინებთ ის ფაქტი, რომ ეს აქსესუარი ასეთი პატარა და შეუმჩნეველია. ის შესანიშნავად გაართმევს თავს დავალებას და თქვენს დივანს, მატრასს თუ ბალიშებს და სქელ ფარდებსაც კი საგულდაგულოდ გააცლის მტვერს.

იატაკისთვის

ეს ყველასთვის ნაცნობი აქსესუარი კი იატაკისთვისაა, თუმცა იატაკიდან მტვრის აღებისას ბევრი არ იყენებს იმ ჯაგრისს, რომელიც ამ აქსესუარს აქვს. სულ ტყუილად! ეს ჯაგრისი თმებს და მსხვილ საგნებს აკავებს, რომლებიც მტვერსასრუტით შეწოვისას შესაძლოა მილში გაიჭედონ და პრობლემები შეგიქმნან. როგორც წესი, ამ აქსესუარს გორგოლაჭებიანი თავი აქვს, რომ დალაგების დროს მანევრირება გაგიადვილდეთ.

აბაჟურის, წიგნებისა და საყოფაცხოვრებო ტექნიკის გასაწმენდად

ეს ფუნჯი-აქსესუარი ზედაპირს არ კაწრავს, ამიტომ იდეალურია საყოფაცხოვრებო ტექნიკის, წიგნების, ფარდების და აბაჟურების გასაწმენდად, რომლებიც ფრთხილ მიდგომას მოითხოვენ.

კუთხეებისთვის

ეს აქსესუარი ძნელად მისადგომი კუთხეებიდან შეძლებს მტვრის აღებას. გარდა ამისა, შეგიძლიათ გამოიყენოთ პლინტუსების და სხვადასხვა ღრიჭოების გასასუფთავებლად.

ცხოველის ბეწვისგან გასაწმენდად

ამ აქსესუარს კი ისინი დააფასებენ, ვისაც სახლში შინაური ცხოველი ჰყავს. რეზინის ჯაგრისი სტატიკურია, ადვილად იკრავს ცხოველის ბეწვს და მის შეწოვასაც აადვილებს.

ხალიჩების გასაწმენდად

ტურბო-ჯაგრისი იდეალურია იმ შემთხვევისთვის, როცა სიმძლავრის მომატება გსურთ. ამ აქსესუარის წყალობით ეფექტურად მოაშორებთ თქვენს ხალიჩას მტვერს.