x
მეტი
  • 28.03.2024
  • სტატია:134028
  • ვიდეო:353919
  • სურათი:508243
ნიკო ფიროსმანის კალიგრაფიის აღდგენა სრულად მოხერხდა
image

მსოფლიო დონის ცნობილი ქართველი თვითნასწავლი მხატვრის ნიკო ფიროსმანაშვილის კალიგრაფიის აღდგენა სრულად მოხერხდა, – წერს დედოფლისწყაროში გამომავალი გაზეთი „შირაქი“, რომელიც შესაბამის ფოტომასალას ექსკლუზიურად ავრცელებს.


ფიროსმანის ხელნაწერების შესწავლა, კალიგრაფიის აღდგენის მიზნით, 6 წლის მანძილზე მიმდინარეობდა. მხატვარ-გრაფიკოსმა თენგიზ ქართველიშვილმა ქართული ანბანის ყველა ასო ფიროსმანის სხვადასხვა ნახატებზე არსებული წარწერების მიხედვით აღადგინა. მისი თქმით, კალიგრაფიის მთელი სიზუსტით აღსადგენად საარქივო მასალები წლების მანძილზე მუშავდებოდა.



ფიროსმანის მკვლევარი და მირზაანის სახლ-მუზეუმის დირექტორი ანზორ მაძღარაშვილი ამბობს, რომ კალიგრაფია მაქსიმალური სიზუსტითაა აღდგენილი და ეს ერთი შეხედვითაც თვალშისაცემია. მაძღარაშვილის განმარტებით, ფიროსმანის ილუსტრაციებითა და ახლადაღდგენილი კალიგრაფიით ნიკო ფიროსმანაშვილის მემკვიდრეობის გადარჩენის ფონდი უახლოეს დღეებში ვეფხისტყაოსანს გამოსცემს.


“ძალიან მნიშვნელოვანი სამუშაოები დასრულდა, ნიმუშის სახით მისი ნაწერი არ გვქონია, ნახატებზე დატოვებული მინაწერებზე დაკვირვებით აღვადგინეთ. ფიროსმანს ვეფხისტყაოსანის თემაზე 20-მდე ნახატი აქვს შექმნილი, ამდენად მისივე ილუსტრაციებით გაფორმებულ ვეფხისტყაოსანს გამოვცემთ, რომლის შრიფტიც ნიკალას კალიგრაფიით იქნება აწყობილი. ვფიქრობთ, ორიგინალური გამოვა. გამოცემას კერძო პირები დააფინანსებენ, “ - აღნიშნავს ფიროსმანის-სახლ მუზეუმის დირექტორი ანზორ მაძღარაშვილი.


პროექტი ნიკო ფიროსმანაშვილის მემკვიდრეობის გადარჩენის ფონდის ძალისხმევით განხორციელდა.


„შირაქი“, ილია მარტყოფლიშვილი

0
65
1-ს მოსწონს
ავტორი:ილია მარტყოფლიშვილი
ილია მარტყოფლიშვილი
Mediator image
65
  
კომენტარები არ არის, დაწერეთ პირველი კომენტარი
0 1 0