ეს ულამაზესი ეკზოტიკური მცენარეა ბიგნონიასებრთა ოჯახიდანაა. მისი სამშობლო ტროპიკული აფრიკა არის.

სპატოდეას მეტსახელად «ხე–ფანტანსაც» ეძახიან. მისი ყვავილები ფორმით ტიტებს წააგავს, მაგრამ ერთი ყვავილედი რამდენიმე ყვავილისგან შედგება და ისეთი შთაბეჭდილება იქმნება, თითქოს ერთი ყვავილი კი არა, ყვავილების თაიგულია.

მცენარის მეორე მშვენება, როგორც უკვე აღვნიშნეთ, ფოთლები არის. თითოეულ ტოტზე, დაახლოებით 13-15 ცალია, წყვილ–წყვილად. ფოთლები მუქი მწვანეა, 15 სმ სიგრძის და 7, 5 სმ. სიგანიაა.

ტიტის ხე ძალიან სწრაფად იზრდება და ბუნებრივ გარემოში, მისი სიმაღლე 10-15 მ. შეიძლება იყოს.

თითოეული ყვავილის გვირგვინის სიმაღლე 10-12 სმ. შეიძლება იყოს. ყვავილები ზევით არის მიმართული და წვიმის დროს, წყლით ივსება.

ხანგრძლივი ყვავილობის შემდეგ, თითოეული ყვავილის ადგილზე, მუქი ყავისფერი, 12-20 სმ-ს სიგრძის პარკი ყალიბდება, რომელშიც თესლი მწიფდება და როდესაც იხსნება – ფრთიანი თესლი ცვივა.

ბუნებრივი გარემოს გარდა, მცენარის გახარება და გამრავლება სახლის პირობებშიც შეიძლება. ქოთანში ის ისე სწრაფად არ იზრდება და სიმაღლეც ბევრად ნაკლები აქვს (დაახლოებით, 2 მ.), მაგრამ დეკორატიულ თვისებებს არ კარგავს და ძალიან ეფექტურად გამოიყურება.

მცენარე ნიადაგისადმი პრეტენზიული არ არის და განსაკუთრებულ მოვლას არ საჭიროებს. არ უყვარს პირდაპირი მზის სხივები, კარგად გრძნობს თავს მყუდრო, მოჩრდილურ გარემოში. ერთადერთი, რაზეც უნდა მიექცეს ყურადღება, რეგულარულად მორწყვის აუცილებლობა არის, გრუნტი ყოველთვის ნოტიო უნდა იყოს.

სპატიოდეა თესლიდან ძალიან სწრაფად იზრდება, მაგრამ ყვავილი რომ გამოიტანოს, გარკვეულ სიმაღლეს უნდა მიაღწიოს. გარდა ამისა, მცენარეს სუსტი და მყიფე ღერო აქვს და საყრდენის გარეშე, შეიძლება გადატყდეს.

ზამთარში ის კარგად განათებულ ოთახში უნდა იყოს, რომელშიც ტემპერატურა 12 გრადუსზე დაბლა არ ეცემა.

ველურ ბუნებაში, მცენარის ტოტებში ფრინველების სხვადასხვა სახეობის წარმომადგენლის ნახვა შეიძლება.