საზოგადოება როგორია სინამდვილეში ჩეჩნური ქორწილი? 2017, 10 ოქტომბერი, 22:41 ჩეჩნური ქორწილი მისთვის დამახასიათებელი ტრადიციებით გამოირჩევა. თავიდან შესაძლოა მოგეჩვენოთ, რომ მის დაგეგმვაში რთული არაფერია, თუმცა ასე ნამდვილად არ გახლავთ. ეს ღონისძიება მრავალი რიტუალისგან შედგება.
ჩეჩნურ საქორწინო ტრადიციებს ზედმიწევნით ზუსტად იცავენ, ითვალისწინებენ ყველა წესს, რომელიც თაობიდან თაობას გადაეცემა.
როცა მშობლიურ სახლთან განშორების დრო დგება, ბევრ პატარძალს უჭირს ცრემლების შეკავება. გავრცელებული სტერეოტიპების მიუხედავად, გოგონებს ძალით არ ათხოვებენ, რადგან ეს პირველ რიგში მათ რელიგიას ეწინააღმდეგება, თუმცა სამწუხარო გამონაკლისი უახლოესი წარსულიდანაც გვახსოვს.
დანიშნულ დღეს გოგონას ოჯახში საქმროს ნათესავები და მეგობრები მიდიან, რომელთა შორისაც აუცილებლად არის მოლა. მან საპატარძლოს მამისგან უნდა მიიღოს თანხმობა ამ ქორწილზე. ამის შემდეგ მოლა უშუალოდ საპატარძლოს მიმართავს მისი თანხმობის მისაღებად, თანაც ეს აუცილებლად სხვა ქალების, როგორც მოწმეების თანდასწრებით უნდა მოხდეს. სასურველია, რომ ეს ქალები ასაკით უფროსი და გათხოვილები იყვნენ. საპატარძლოსგან თანხმობის მიღების შემდეგ, მოლა ყურანიდან სურებს კითხულობს, სხვები კი იმეორებენ. მოგვიანებით, ასეთივე რიტუალი იმართება სასიძოსა და მისი მოწმეების თანდასწრებით და ასე ხდება წყვილის დაქორწინება. პატარძლის მშობლები ქორწილში არ მიდიან და მათ სახლში გამართულ ზეიმშიც მინიმალურ მონაწილეობას იღებენ.ქალიშვილის გათხოვება მათთვის მართალია სასიხარულო მოვლენაა, მაგრამ ტრადიციების გათვალისწინებით აღქმული უნდა იყოს, როგორც სევდიანი მოვლენა. მზითვი და საჩუქრები სასიძოს ნათესავებს მიაქვთ პატარძლის ახალ სახლში. რაც შეეხება სასიძოს, ის ქორწილში აქტიურად არ მონაწილეობს. მისთვის მომზადებულ ოთახში ზის თავის მეგობრებთან ერთად და იქ ერთობა. საუკეთესო ტრადიციების მიხედვით, ქორწილში არ უნდა გამოჩნდეს, მშობლებსა და ნათესავებსაც კი არ უნდა დაენახვოს, ამიტომ პატარძალი მისმა მეგობარმა ან ახლო ნათესავმა უნდა წამოიყვანოს. როგორც წესი, პატარძლის წასაყვანად მომავალ კორტეჟს პატარძლის ნათესავები გზას უღობავენ და მხოლოდ გამოსასყიდის გადახდის შემდეგ უშვებენ. ასევე იქცევიან მეზობლის ბავშვები, რომლებიც გამოსასყიდის თავის წილს ითხოვენ, რომ მანქანები პატარძლის ეზოდან გაუშვან. თანამედროვე ჩეჩნური ქორწილები უფრო ხშირად რესტორანში იმართება და 3 დღეს გრძელდება, თუმცა რესტორანში მხოლოდ პირველი დღე აღინიშნება, რომლის განუყოფელი ნაწილი, სუფრასთან ერთად, ნაციონალური ცეკვებია. საქორწინო ცერემონიისას პატარძალი ახალ ნათესავებს ეცნობა, ქორწილამდე მას მხოლოდ საქმროს დასთან აქვს ურთიერთობა. სტუმრები ქორწილში საჩუქრებით მოდიან. ქალები საოჯახო ნივთებს ჩუქნიან, მამაკაცები კი ფულს. მთელი დღის განმავლობაში პატარძალი მისთვის მომზადებულ კუთხეში დგას, სადაც მის გასაცნობად პერიოდულად მიდიან ახალი ნათესავები. დაჯდომა მას მხოლოდ მულის და დედამთილის ნებართვით შეუძლია, რომლებიც მას სხვა სტუმრებისგან მოშორებით სვამენ. 955 5-ს მოსწონს
|