ათენი საბერძნეთის ერთ-ერთი ყველაზე ღირსშენანიშნავი პოლისია. ძვ.წ. 1 ათასწლეულის მანძილზე ის ბერძნული ცივილიზაციის ცენტრი იყო. ათენის "ოქროს ხანა" ძვ.წ. მეხუთე-მეოთხე საუკუნეებზე მოდის. ათენი მდებარეობს ატიკის ცენტრალურ ვაკეზე. ეს ვაკე სამი მხრიდან მთებით არის შემოსაზღვრული, ხოლო სამხრეთით მას სარონიკული ყურე ესაზღვრება. მთები ათენისათვის ბუნებრივი დამცავი საშუალება იყო, ხოლო ნავსადგურისთვის ხელსაყრელი ყურე ზღვაოსნობის განვითარებას უწყობდა ხელს. ბერძნულ პოლისებს შორის ათენს ყველაზე მეტი სამხედრო და სავაჭრო ხომალდი ჰქონდა.