1965 წლის დეკემბერი, ალკამო-სიცილიის პატარა ქალაქი: 18 წლის გოგონა ახალგაზრდა ვაჟმა მოიტაცა თავის შვიდ მეგობართან ერთად. გოგონას გაუჩინარებას დიდი აჟიოტაჟი არ მოჰყოლია, რადგან სიცილიაში ეს იყო აბსოლუტურად ჩვეულებრივი მოვლენა, მიღებულ პრაქტიკა, რომელიც წინ უსწრებდა ქორწილს.

ადგილობრივი წეს-ჩვეულებების და მაშინდელი სისხლის სამართლის კოდექსის მიხედვით, თუ ქალი ცოლად გაჰყვებოდა მამაკაცს, რომელმაც ის მოიტაცა და გააუპატიურა, კაცის საქციელი კანონით არ ისჯებოდა, ხოლო ქალიშვილის შელახული პატიოსნება და ღირსება სავსებით იყო რეაბილიტირებული, ანუ საზოგადოების თვალში ეს დანაშაული კი არ იყო, არამედ ჩვეულებრივი მოვლენა ოჯახის შესაქმნელად.

ტრადიციული სოციალური კოდექსის მიხედვით, იმ შემთხვევაში, თუ გოგონა უარს იტყოდა რეაბილიტაციურ ქორწინებაზე, მაშინ ის ხალხის თვალში უღირს ქალად («donna svergognata») გადაიქცეოდა, რადგან მან ქალიშვილობა დაკარგა ქორწინების გარეშე. ასე რომ, კანონი მთლიანად მომტაცებელი მამაკაცის მხარეზე იყო და მაშინაც კი, თუ ქალი გამტაცებელზე დქორწინებას არ მოისურვებდა, მოძალადე დაუსჯელი რჩებოდა, ამიტომ მოტაცებული გოგონების დიდი ნაწილი (თითქმის 100%) იძულებული ხდებოდა თუნდაც მისთვის არასასურველ მამაკაცთან შეექმნა ოჯახი, რათა საზოგადოების თვალში ღირსებაშელახული არ გამოსულიყო (განა მარტო სიცილიაში? - ეს ტრადიცია ლამის მე-20 საუკუნის ბოლომდე ფართოდ იყო ჩვენთანაც გავრცელებული, განსაკუთრებით რეგიონებში).

დავუბრუნდეთ მოტაცებულ გოგონას-მისი სახელი ფრანკა ვიოლა გახლდათ; გატაცების და ძალადობის ცხრა დღის შემდეგ მან მოახერხა გამოპარვა. ფრანკამ გამოწვევა ესროლა საზოგადოებას და არ შეურიგდა თავის ბედს, მან დახმარებისთვის პოლიცის მიმართა, შეიტანა რა საჩივარი გამტაცებლისა და მისი მეგობრების წინააღმდეგ. ეს იყო პირველი შემთხვევა სიცილიის ისტორიაში, როცა ქალმა ხმა აიმაღლა დაწესებული მორალის ნორმების წინაშე და საზოგადოების მხრიდან შეურაცხყოფა, სკანდალი, შანტაჟი და დამცირება არჩია მოძალადეზე დაქორწინებას. ერთი წლის შემდეგ, 1966 წლის ნოემბერში ვაჟი გასამართლებული იქნა მოტაცების და გაუპატიურების ბრალდებით, ხოლო მისი მეგობრები - როგორც დანაშაულის თანამონაწილეები.

ფრანკა ვიოლა დღესაც ცოცხალია. მისმა ისტორიამ დიდი რეზონანსი გამოიწვია მაშინდელ საზოგადოებაში და მონენტალურად გახდა ქალთა ემანსიპაციისათვის ბრძოლის დროშა, საბოლოდ შეცვალა იტალიაში სქესთა შორის ურთიერთობაში დაწესებული მორალის ნორმები და დაასრულა ბარბაროსული პრაქტიკა სექსუალური ძალადობის მსხვერპლთა შანტაჟისა.

იტალიაში მხოლოდ 1981 წელს გაუქმდა კანონი, რომლის მიხედვითაც გაუპატიურება არ ითვლებოდა დანაშაულად, თუკი მამაკაცი მის მიერ გაუპატიურებულ ქალზე დაქორწინდებოდა, თუნდაც მისი სურვილის წინააღმდეგ.

იტალიის პრეზიდენტის 2014 წლის 13 თებერვლის ბრძანებულებით ფრანკა ვიოლა დაჯილდოვდა ორდენით" იტალიის ხალხის წინაშე დამსახურებისათვის".