კომპანია Hyundai-მ შეიმუშავა მანქანის კარის ახალი ტიპი. ამგვარ სატრანსპორტო საშუალებებს Hyundai-ში recreational vehicle (დასვენებისთვის განკუთვნილი ტრანსპორტი) უწოდეს. კარების ახალი ტიპი კორეელებმა აშშ-ში დააპატენტეს.

ახალი კარი აერთიანებს უკანა კარების ორ სახეობას: გასაწევ და ასაწევ კარს. გასაწევი ვარიანტი გამოიყენება მგზავრეის ჩასასხდომად თუ ჩამოსასვლელად, ხოლო ასაწევი კარები ამარტივებს საგნების ჩატვირითვა-გადმოტვირთვას.

"ავტომობილის კარის გახსნა შესაძლებელი რომ იყოს სატვირთო მანქანის გვერდითი კედლის მსგავსად, ეს უფრო დიდი სივრცის შეგრძნებას წარმოშობდა და გაამარტივებდა ტვირთის ჩადება-გადმოღებას, " - ნათქვამია პატენტის საბუთებში. იქვე აღნიშნულია, რომ Hyundai-ში ითვალისწინებენ ასაწევი კარის უხერხულობას მგზავრებისთვის, რადგან მუდმივად კარის ამგვარად გაღება მოუხერხებელია.

კორეული ავტომწარმოებლის საბუთებში მითითებულია ასევე, რომ მსგავსი გადაწყვეტილება სასარგებლო იქნებოდა მათთვისაც, ვისაც უყვარს მოგზაურობა, მაგრამ განიცდის ადგილის უკმარისობას მანქანაში - ტრეილერები და მისაბმელები კი საკმაოდ ძვირია.

2015 წლის გაზაფხულზე კომპანია Hyundai-მ დააპატენტა ტექნოლოგია, რომელიც თიშავს მობილურ ტელეფონებს ან ბლოკავს მისი ფუნქციების გარკვეულ ნაწილს, როცა მფლობელი საჭესთან ზის. ავტომწარმოებლის აზრით, ამან უნდა გაზარდოს საგზაო მოძრაობის უსაფრთხოება, რადგან მძღოლს ყურადღება ნაკლებად გაეფანტება.