მსოფლიოს უმეტეს ქვეყნებში ბავშვთა შრომა აკრძალულია, თუმცა ეს გარემოება ხელს არ უშლის ზოგიერთ საწარმოს აქტიურად ეწეოდეს ბავშვთა ექსპლუატაციას."შრომის საერთაშორისო ორგანიზაციის"(International Labour Organisation)შეფასებით მთელს მსოფლიოში დღეისთვის შრომით საქმიანობაში ჩართულია 260 მილიონი ბავშვი, აქედან ნახევარზე მეტი, 170 მილიონი საფეიქრო მრეწველობაშია დასაქმებული, როგორც წვრილი საწარმოებში, აგრეთვე მსხვილ კომპანიებშიც.

სხვადასხვა ჟურნალების რედაქციებს არაერთხელ შეუღწევიათ მსგავს საწარმოებში და რეპორტაჟიც გაუკეთებიათ, თუმცა ამით ფაქტიურად არაფერი იცვლება.

შრომის საერთაშორისო ორგანიზაციის მონაცემებით ბავშვები დასაქმებულები არიან საფეიქრო მრეწველობის ყველა ეტაპზე:ნედლეულის მოპოვებით დაწყებული და საკერავი მანქანით დამთავრებული.

2011 წელს უზბეკეთი გაება ე.წ. "ბამბის სკანდალში":წამყვანმა ტანსაცმლის ბრენდებმა ბოიკოტი გამოუცხადეს ქვეყანას ბამბის მოსავალის აღებაში ბავშვების ექსპლუატაციის გამო.Human Rights Watch-ის მონაცემებით ყოველი წლის შემოდგომაზე 1.5 მილიონი ბავშვი გადის მინდვრებზე ნედლეულის მოსაპოვებლად, მათ შორის ბევრი სასკოლო ასაკისაც კი არ არის.

სკანადალი იქამდე მივიდა, რომ პარიზში გამართულ მაღალი მოდის კვირეულზე, ორგანიზატორებმა უარი განაცხადეს უზბეკეთის პრეზიდენტის ქალიშვილის გულნარა კარიმოვის დასწრებაზე.Human Rights Watch-მა ასეთი კომენტარი გააკეთა კარიმოვის მისამართით:"აიძულო ბავშვები იშრომონ, არც ისე გლამურია".

როგორც International Labour Organisation იტყობინება, ბავშვთა ექსპლუატაციის მხრივ საფეიქრო და სამკერვალო მრეწველობაში ლიდერობენ ბანგლადეში, ეგვიპტე, ტაილანდი, პაკისტანი და ჩინეთი.მარტო ბანგლადეშში 7000 წვრილი ფაბრიკაა სადაც ბავშვები არიან დასაქმებულები.მათი საშუალო ასაკი 10-იდან 14 წლამდეა.ბავშვები კვირაში 6 ან 6, 5 დღე მუშაობენ.