საქართველოს ყოფილმა პრემიერ-მინისტრმა ბიძინა ივანიშვილმა ინტერვიუ მისცა "გურია ნიუსს", სადაც განაცხადა, რომ „ქართული ოცნების“ ხელისუფლებამ არჩევნებამდე მიცემული ყველა დაპირება შეასრულა. ივანიშვილის თქმით, განცხადება იმის შესახებ, რომ დაპირებები არ სრულდება, არასწორი ანალიზის შედეგია. ყოფილი პრემიერის შეფასებით მედიას და საზოგადოებას არასწორი დასკვნები გამოაქვთ:

“მედიაც სცოდავს ცოტას და საზოგადოებაც სწორ ანალიზს არ აკეთებს და არ აკეთებენ სწორ დასკვნებს. მე არ მგონია, რომ ჩვენ დაპირებების რომელიმე ნაწილი არ შევასრულეთ. მე მრავალჯერ მითქვამს და დღესაც შემიძლია გავიმეორო, რომ მე ვიზიარებ ჩემს წილ პასუხისმგებლობას დაპირებებთან დაკავშირებით, მიუხედავად იმისა, რომ დღეს ხელისუფლებაში არ გახლავართ. სიამოვნებით ჩავერთვებოდი, თუ გნებავთ, რაღაც კონფერენცია გავაკეთოთ, გნებავთ მედიასთან, გნებავთ სპეციალისტებთან ერთად, ექსპერტებს ეძახიან საკუთარ თავს რომლებიც და დავასაბუთოთ - აი, რა ვთქვით, რას დავპირდით და რა არ გავაკეთეთ? ”- განაცხადა ბიძინა ივანიშვილმა.

საქართველოს ყოფილი პრემიერ-მინისტრის განცხადებით, არასწორია, როდესაც ოპოზიცია ხელისუფლების ყველა ქმედების მიმართ უარყოფით დამოკიდებულებას ამჟღავნებს და აკრიტიკებს. მისი თქმით, აღნიშნული ფაქტი ნაკლებგანვითარებულობის მანიშნებელია:

“ ერთი პრობლემაა, ოპოზიციას ჰგონია, რომ ყოველთვის უნდა აკრიტიკოს - კარგია, ცუდია... ყოველთვის უნდა თქვას ცუდი, როგორი კარგიც არ უნდა გააკეთოს ხელისუფლებამ. მე მგონია, რომ ცოტა აქაც განვითარება გვაკლია. ოპოზიციამ უნდა მოახერხოს და გაბედოს კარგზე კარგის თქმა და ცუდი აკრიტიკოს და უკეთესი გზები აჩვენოს, ”- განაცხადა ბიძინა ივანიშვილმა „გურია ნიუსთან“ ინტერვიუში.