აღდგომა ახლოვდება და ბევრი ემზადება კულიჩი სახლში, თავადვე მოამზადოს.
როგორც იტყვიან, კულიჩის იმდენი რეცეპტი არსებობს, რამდენი დიასახლისიცაა. ამჯერად
წარმოგიდგენთ ე.წ. მოხარშულ ცომზე მომზადებულ კულიჩს, რომელიც განსაკუთრებით ფუმფულა,
ნაზი და, ამავდროულად, არც თუ ისე მშრალი ტექსტურით
გამოირჩევა.

ინგრედიენტები (4 საშუალო ზომის კულიჩისთვის, მთლიანობაში 1, 25 კგ.):

- რძე 250მლ
- საფუარი 25გ. (დაპრესილი, ცოხცალი საფუარი)
- ფქვილი 700გ.
- კარაქი 130გ.
- შაქარი 225გ.
- კვერცხი 4 ცალი(4 გული და 3 ცილა)
- ვანილი 2 ჩ.კ.

- 1/2 ფორთოხლის ცედრა
- მარილი 1/4 ჩ.კ.
- 150გ. ჩირისა და თხილის ნაზავი (ქიშმიში, კურაგა, ნუში, ნიგოზი, ცუკატები)
- მოსართავად, სურვილისამებრ, შოკოლადის ან შაქრის მინანქარი.

210 მლ. რძეს დავამატებთ 50 გ. კარაქს და მივიყვანთ ადუღებამდე. როგორც კი დუღილს დაიწყებს, სწრაფად ჩავყრით 50 გ. გაცრილ ფქვილს და კარგად ვურევთ. მივიღებთ სქელ, გლუვ მასას. გადმოვდგამთ ცეცხლიდან და გავაგრილებთ ოთახის ტემპერატურამდე.

40 მლ. თბილ რძეში (25-30ºС) შევურიოთ 5 გ. შაქარი და 40 გ. საფუარი. დავდგათ თბილ ადგილას ამოსასვლელად 10-15 წთ.

გაგრილებული მოხარშული ცომი და ამოსული საფუარიანი მასა ერთმანეთს შევურიოთ. დავახუროთ საკონდიტრო ცელოფანი და ისევ დავდოთ თბილ ადგილას ამოსასვლელად. ამას დაახლოებით 1-1, 5 საათი დაჭირდება.

გავაცალკევოთ კვერცხის გულები და ცილები. გულებს შევურიოთ მარილი, კარგად ავთქვიფოთ და ცოტა ხნით გავაჩეროთ. ამგვარად კვერცის გულები ცომს უფრო ინტენსიურ ყვითელ ფერს მისცემს.

როცა ცომი ამოვა, მარილიანი კვერცხის გულებს ავთქვიფავთ (ხელის სათქვეფით) შაქართან, შემდეგ დავამატებთ ვანილს და ცედრას. ამოსულ ცომს ვამატებთ კვერცხიანი მასის ნახევარს, 100 გ. ფქვილს, ავურევთ და ისევ ვდებთ ამოსასვლელად 1 სთ-ით.

ამოსულ ცომში ვამატებთ კვერცხის გულების დარჩენილ მასას და 30 გ. არაჟანს. კარგად ავურევთ. თანდათან ვამატებთ გაცრილ ფქვილს. როგორც კი მოზელა შესაძლებელი გახდება, გადმოვიტანთ ცომს ფქვილმოყრილ მაგიდაზე, თანდათან ვამატებთ ფქვილს და ვზელთ სანამ ხელზე და მაგიდაზე აღარ მიეკრობა, დაახლოებით 30 წთ. ამისთვის დაგვჭირდება დაახლოებით 300-350 გ. ფქვილი.

შემდეგ ძალიან დარბილებულ 80 გ. კარაქს შევაზელთ ცომში, ვზელთ დაახლოებით 10 წთ, სანამ ელასტიური არ გახდება.

3 კვერცხის ცილას და 110 გ. შაქარს გავთქვიფავთ ბეზედ და მასაც, ისევე, როგორც კარაქს, შევაზელთ ცომში. ცომი ცოტა გათხელდება, მაგრამ თანდათან ისევ დავამატებთ ფქვილს და 15-20 წთ. ზელის შემდეგ იგი ისევ შეიკვრება. მიღებულ ცომს ისევ ვდებთ ამოსასვლელად (2-2, 5 სთ).

ამოსულ ცომს ჩავზელთ და შევურევთ ჩირის და თხილის ნაზავს. ვზელთ 7-10 წთ. და ისევ ვდებთ ამოსასვლელად (2 სთ).

ამოსულ ცომს ისევ ჩავზელთ. ცხიმწასმულ და ფქვილმოყრილ ფორმებს შევათბობთ გაზქურაში (დაახლოებით 1 წთ), და ვდებთ ცომს ისე, რომ ფორმის მხოლოდ 1/3 შეავსოს. ისევ ვდებთ ამოსასვლელად 1 სთ.

ამოსულ კულიჩებს ვაცხობთ 180 გრადუსზე, 20-დან 50 წთ-მდე, კულიჩის ზომის მიხედვით (რაც უფრო დიდი ზომისაა, მით მეტი დრო სჭირდება). კულიჩის მზაობას ვამოწმებთ ხის ჩხირით: ჩავარჭობთ ჩხირს, თუ მშრალი ამოვიდა, კულიჩი მზადაა.

მზა კულიჩებს გამოვიღებთ, დავაცდით 2 წთ. და ამოვიღებთ ფორმებიდან.

თუ სურვილი გვაქვს, გაგრილებულ კულიჩებს მოვრთავთ შოკოლადის ან შაქრის მინანქრით, ან უბრალოდ მოვაფრქვევთ შაქრის პუდრს.