"მანდარინების" მიერ "ოსკარის" ვერმოპოვებამ და ქართველი მსახიობების ვოიაჟმა ლოს-ანჟელესში ქართულ ინტერნეტ-სივრცეში არაერთგვაროვანი რეაქცია და მითქმა-მოთქმა გამოიწვია. ჯერ იყო და "ოსკარის" ცერემონიაზე ჩაძინებული მიშა მესხის სურათებით აივსო ქართული საიტები, რასაც უამრავი, საკმაოდ არაკორექტული, დამცინავი და არაკეთილმოსურნე კომენტარი მოჰყვა.

ეს კიდევ არაფერი, დღეს დილით მსახიობ ია სუხიტაშვილის ფეისბუქის გვერდზე უცნობმა პიროვნებამ კომენტარი დატოვა, სადაც ამბობს, რომ ია სუხიტაშვილი სულაც არ იყო მიწვეული ცერემონიაზე და თურქული აჟიოტაჟი ამ ფაქტის შესანიღბად დასჭირდათ. აი ეს კომენტარი:

"არ გეწყინოთ, ქალბატონო ია, მაგრამ ამ პატარა "ბლეფი"-თ ყველას მოტყუება შეუძლებელია."ოსკარი"-ს დაჯილდოების ცერემონიაზე ოფიციალური მიწვევა ქონდათ მხოლოდ ზაზა ურუშაძეს, მიშა მესხს და გიორგი ნაკაშიძეს. ია სუხიტაშვილს წასვლამდე მცირე იმედი ქონდა, როგორც თანმხლებს მიცემდნენ დასწრების უფლებას, მაგრამ თურქეთში ჩაფრენისას გაიგეს, რომ ის მცირე შანსიც არ იყო. ასე რომ, რაღაც მიზეზების გამოგონებას შეეშვან. ეჭვი მაქვს, პასპორტის დაკარგვაც გათამაშებული იყო სწორედ იას სიტუაციიდან გამოსაყვანად. ბილეთის და მოსაწვევის გარეშე ხალხი სტადიონზე ვერ შედის და ამხელა ღონისძიებაზე ვინ შეგიშვებდათ. მაინც დიდად მოგებული დარჩით, ლოს ანჟელესში გაისეირნეთ და ღონისძიებას თუნდაც გარედან, მაგრამ ახლოდან უყურებდით. "ოსკარი" რომ აეღო ფილმს, მართლა კარგი იქნებოდა."

როგორც ჩანს, ია სუხიტაშვილი ძალიან გააბრაზა ამ ბოღმითა და ნიშნის მოგებით აღსავსე კომენტარებმა და საპასუხოდ თავის ფეისბუქის გვერდზე ასეთი პოსტი გამოაქვეყნა:"

„ყველამ წაიკითხეთ ეს და გულისხმიერ ადამიანებს გთხოვთ, გააზიაროთ. ორი დღეა, ლამის გული გამისკდეს ისეთ საძაგლობას წერენ ჩვენზე, თურმე ქვეყნის რა ბრალია, უვარგისები ვყოფილვართ და ამიტომაა ჩვენ ქვეყანაში ასე ცუდად რომ მისდის საქმე. ამდენი ბოროტი ადამიანი თუ ცხოვრობდა ჩემს ქვეყანაში, მაინც არ მჯეროდა ბოლომდე.
სრული სერიოზულობით ვიძახი, მოეშვით ისტორიების შეთხზვას, ისე ნუ გაგვამწარებთ, რომ ზოგიერთ ქართულ საიტს ვუჩივლოთ“.