წინა სტატია ვინც წაიკითხა, გაეცნო თემას ზოგადად მაინც, თუ რა არსებული პირობები შეიძლება იყოს ოჯახის ნგრევის მიზეზი. საკითხი გამახვილებული მქონდა მამაკაცების ყურადღებაზე, თუმცა რჩევები არც ქალებს გვაწყენდა.

ოჯახური იდილია მთავარია ნებისმიერი სქესის ადამიანისთვის. ოჯახი მთავარია სიყვარულით იყოს შექმნილი-ო ვამბობთ, მაგრამ ეს ცნებაც არ დაიჯეროთ, რადგან სიყვარულით შექმნილ ოჯახებშიც ძნელია ხანგრძლივი დროის განმავლობაში სიმშვიდისა და ურთიერთობის შენარჩუნება არსებული პრობლემების გამო.

რა ვქნათ ჩვენ დიასახლისებმა, თუ მეუღლე მუშაობს, გადაღლილია და სხვა ათასი საფიქრალი აქვს? პირველ რიგში მიზნად უნდა დავისახოთ, რომ მას ყოველთვის სახლში ჩვენთან მოსვლა მოუხაროდეს და სიმშვიდეს სხვაგან არ ეძებდეს. ამისთვის მოგცემთ რჩევებს ქალებს, რათა ოჯახური ცხოვრების საძირკველი იყოს მყარი.

ყოველთვის შეეგებეთ ქმარს სიხარულით და შეეცადეთ სახლში დაბრუნებულს შეუქმნათ სასიამოვნო წუთები. დახვდი მოწესრიგებული და გალამაზებული, საუბარი დაიწყე კარგი სიახლეებით, ცუდზე კი კრინტი არ დაძრათ, სანამ არ დაისვენებს. უნდა იგრძნოს, რომ მონატრებული ელოდით. დაახვედრეთ დალაგებული სახლი და მომზადებული სადილი. ყოველთვის გახსოვდეთ, რომ სიყვარული და სიმშვიდე ეს უპირველესი რამაა რაც მას სჭირდება.

არ იწუწუნოთ და იყავით მადლიერი იმითი, რაც გაქვთ. შეუძლებელს ნუ მოითხოვთ, მიეხმარეთ ქმარს მომჭირნეობაში და ნუ დახარჯავთ მის ფულს უმიზნოდ, თუმცა ეს არ ნიშნავს იმას, რომ ცხოვრებისეულ სიამოვნებებზე უარი უნდა თქვათ. ყველაზე შეყვარებულ ქმარსაც კი არ შეუძლია აიტანოს უმადური ცოლი, ამიტომ დააფასეთ მისი ღვაწლი.

ერთგულება და პატივისცემა ყველაზე მნიშვნელოვანია ოჯახური ბედნიერებისთვის. დაიცავით ოჯახის სიწმინდე და თავიდან აიცილეთ ნებისმიერი აკრძალული ურთიერთობა. თქვენი პირადი ცხოვრება და ოჯახური საკითხები არ უნდა გახდეს მეგობრების განხილვის საგანი. ქმარმა ყოველთვის უნდა იგრძნოს თქვენი თანადგომა, განსაკუთრებით მაშინ, როცა პრობლემები აქვს. იყავით მომთმენი მაშინაც კი, როცა გიჭირთ. თუ ის ცუდათ მოგექცათ, შეეცადეთ სიკეთით უპასუხოთ და დაანახოთ სიმშვიდის ძალა.

ყოველთვის შეინარჩუნეთ სიმშვიდე და არასოდეს გახდეთ კამათის ინიციატორი. დაიცადეთ სანამ გაღიზიანებული მეუღლე დამშვიდდება და შემდეგ განიხილეთ საკითხი. იყავით მზრუნველი და კეთილგონიერი დედა, ყოველთვის მოწესრიგებული გყავდეთ ბავშვები, ყურადღება მიაქციეთ სწორ კვებას, განათლებას და კარგ მანერებს.

პატივი ეცით ქმრის ახლობლებს და იყავით მათ მიმართ კეთილგანწყობილნი და მეგობრულნი. ყოველთვის გახარებული შეეგებეთ ქმრის სტუმრებს და სიამოვნებით გაუმასპინძლდით.

ეცადეთ ყოველთვის წუწუნის გარეშე გაართვათ თავი საოჯახო საქმეებს.

ამ სტატიის წაკითხვის შემდეგ, ზოგიერთ თანამედროვე ქალს პროტესტის გრძნობა გაუჩნდება, მაგრამ მერწმუნეთ, ეს ის გამოცდილი მეთოდია, რომელსაც ბედნიერი ოჯახების ბედნიერი დიასახლისები იყენებენ. იყავით მშვიდი, მომთმენი, მორჩილი, მოსიყვარულე, ალერსიანი და ამასთან ერთად არ დაკარგოთ ღირსება, ზომიერება, საკუთარი თავისა და აზრის პატივისცემა, მომხიბვლელობა, რომლის გარეშეც ნებისმიერი შეყვარებული მამაკაციც კი ზურგს შეგაქცევთ. თქვენი (და ასევე მეუღლის) ბედნიერება თქვენს ხელთაა.

გისურვებთ წარმატებას და ბედნიერებას.