"ევროპის სახალხო პარტია', რომელიც ყოფილი ხელისუფლების მხარდამჭერ და მეგობარ პარტიად მოიაზრება, განცხადებას ავრცელებს, სადაც საუბარია ევროპარლამენტის დელეგაციის სტუმრობაზე საქართველოში და იმ წერილზე, რომელიც საქართველოს იუსტიციის მინისტრს თეა წულუკიანს გამოუგზავნა ერთ-ერთმა წევრმა კრჟიშტოფ ლისეკმა.აღნიშნული წერილით ირკვევა, რომ ევროპარლამენტის წევრი "ნაციონალური მოძრაობის" გენერალურ მდივანთან და დღეს პატიმრობაში მყოფ ვანო მერაბიშვილთან პერსონალურ შეხვედრას ითხოვს, რადგან დარწმუნდეს დაცულია თუ არა მერაბიშვილის უფლებები: - "...ვანო მერაბიშვილთან ვიზიტის მიზანი იმ პირობების დადგენაა, რომელშიც ყოფილი პრემიერი იმყოფება, ასევე მსურს დავრწმუნდე, დაცულია თუ არა ციხეში მერაბიშვილის უფლებები"- ნათქვამია წერილში.
როგორც ევროპარლამენტარი ლისეკი აცხადებს, ახალმა ხელისუფლებამ ოპოზიციის მთავარი კანდიდატი ჩამოიშორა საპრეზიდენტო არჩევნებში და ყოფილი პრემიერის დაპატიმრების გამო შეშფოთებას არ მალავს: - " ვანო მერაბიშვილის დაპატიმრება, რომელიც ოქტომბერში გასამართი საპრეზიდენტო არჩევნების ერთ-ერთი პოტენციური კანდიდატია, ევროპელ პოლიტიკოსებში შეშფოთებას იწვევს და ბადებს ეჭვებს, რომ პრეზიდენტობის კანდიდატობისთვის ბრძოლაში ხელისუფლება ცდილობს, ჩამოიშოროს ოპოზიციის მთავარი კანდიდატი".-ნათქვამია ზემოთმოხსენიებულ წერილში.
თუ რა გადაწყვეტილებას მიიღებს ახალი ხელისუფლება და კონკრეტულად იუსტიციის მინისტრი, შეხვდება თუ არა პერსონალურად ვანო მერაბიშვილს ევროპარლამენტარი, ჯერჯერობით უცნობია.
