გასული კვირის ბოლოს სამხრეთ ოსეთის დე ფაქტო რესპუბლიკის პარლამენტმა რუსეთის ფედერაციის ხელძღვანელობას მიმართა თხოვნით 1920 წლის მოვლენები ოსი ხალხის გენოციდად აღიაროს. ცხინვალიდან მიმართვის ტექსტი გაუგზავნეს რუსეთის პრეზიდენტს, რუსეთის მთავრობასა და სახელმწიფო სათათბიროს. მიმართვაში 1920 წლის მოვლენებთან დაკავშირებით ნათქვამია: „საქართველოს აგრესიის ფორმალურ მიზეზად იქცა სამხრეთ ოსეთის რევოლუციური კომიტეტის მიერ მიღებული ბრძანება 1920 წლის 8 ივნისს საბჭოთა ხელისუფლების გამოცხადებისა და სამხრეთ ოსეთის საბჭოთა რუსეთთან შეერთების შესახებ. იმავე წლის 12 ივნისს საქართველოს არმიამ, პოლკოვნიკ ჩხეიძის (უნდა იყოს ჯუღელის - რედ.) ხელმძღვანელობით, დაიწყო ოპერაცია სამხრეთელი ოსების წინააღმდეგ. ქართულმა ჯარმა გადაწვა პრაქტიკულად ყველა ოსური სოფელი ცხინვალიდან ჩრდილოეთის დასახლება როკამდე. დახოცეს მოსახლეობა, არ ინდობდნენ ბავშვებს, ქალებს და მოხუცებს“.

დე ფაქტო რესპუბლიკის პარლამენტში გენოციდის აღიარების შესახებ დოკუმენტის მომზადებას ბიძგი მისცა რუსეთის ფედერაციის პრეზიდენტის, ვლადიმირ პუტინის, 9 ივლისის გამოსვლამ.

სამხრეთ ოსეთის დე ფაქტო პარლამენტის პირველივე სესიაზე პარტია „ნიხასი“ გამოვიდა ინიციატივით, მიემართათ რუსეთის ხელისუფლებისთვის. დოკუმენტის პროექტი ეროვნული პოლიტიკის, კულტურის, რელიგიისა და მედიის კომიტეტში შეადგინეს და გასული კვირის ბოლოს უკვე პარლამენტის დეპუტატებმა მხარი დაუჭირეს. პარტია „ნიხასის“ დეპუტატი დავით სანაკოევი რადიო თავისუფლების რუსულენოვან პროგრამა „ეხო კავკაზასთან“ საუბარში აცხადებს, რომ გენოციდის აღიარების მოთხოვნის საკითხი სამხრეთ ოსეთში არაერთხელ დაისვა. მისი აზრით, 1920-იანი წლების მოვლენებს შესაბამისი შეფასება რომ მისცემოდა, საქართველო სამხრეთ ოსეთის მიმართ აგრესიას ვერ გაბედავდა ვერც 1990-იან წლებში და ვერც 2008 წელს.

დე ფაქტო რესპუბლიკის პარლამენტში გენოციდის აღიარების შესახებ დოკუმენტის მომზადებას ბიძგი მისცა რუსეთის ფედერაციის პრეზიდენტის, ვლადიმირ პუტინის, 9 ივლისის გამოსვლამ. პუტინმა განაცხადა, რომ 1918 წელს აფხაზეთში და 1920 წელს სამხრეთ ოსეთში განვითარებული მოვლენები გენოციდი იყო. მოსკოველი პოლიტოლოგი ნიკოლაი სილაევი „ეხო კავკაზასთან“ საუბარში აღნიშნავს, რომ რუსეთის პრეზიდენტის შეფასებებმა ოსებსა და აფხაზებში გამოცოცხლება გამოიწვია, მაგრამ არ ღირს ვლადიმირ პუტინის ამ სიტყვებიდან დავასკვნათ, რომ რუსეთი ოსთა და აფხაზთა გენოციდის აღიარებისთვის მზადაა.