მანანა არჩვაძე ცოტნეს მკურნალობისთვის ფულს აგროვებს - თუმცა მათ ფონდი „ქართუ“ აფინანსებს
მორიგი დაპირისპირება პირველი პრეზიდენტის ზვიად გამსახურდიას ოჯახში. ამჯერად ერთმანეთს მანანა არჩვაძე და გიორგი გამსახურდია უპირისპირდებიან. ირკვევა, რომ დაჭრილი ცოტნე გამსახურდიას მკურნალობისთვის დედა ფულს აგროვებს და საზოგადოებას დახმარებას სთხოვს, გიორგი გამსახურდია კი ირწმუნება, რომ ხარჯებს „ქართუ“ ფონდი ფარავს და საზოგადოება შეცდომაში არ უნდა შევიდეს.
ექსპრეზიდენტ ზვიად გამსახურდიას მეუღლემ, მანანა არჩვაძე-გამსახურდიამ, სოციალურ ქსელში ანგარიშის ნომერი გამოაქვეყნა და დაწერა, რომ შეგროვებული თანხა მისი შვილის მკურნალობის ხარჯებს მოხმარდება. არადა, რამდენიმე თვის წინ ცნობილი გახდა, რომ ცოტნე გამსახურდიას მრავალთვიანი მკურნალობის საკმაოდ სოლიდურ ხარჯებს ბიძინა ივანიშვილის მიერ დაფუძნებული ფონდი „ქართუ“ აფინანსებს.
„გაიხსნა მიზნობრივი ანგარიში ცოტნე გამსახურდიას მკურნალობის ხარჯების გასაწევად. მსურველებს გთხოვთ მითითებულ ანგარიშზე მოახდინოთ თანხების ჩარიცხვა“ - წერია ტექსტში, რომელიც მანანა არჩვაძე-გამსახურდიამ გამოაქვეყნა.
დედის მიერ გამოქვეყნებული ინფორმაცია გიორგი გამსახურდიამ ასე შეაფასა:
„ჩემი ძმის მკურნალობის ხარჯებს სრულიად ფარავს საქველმოქმედო ფონდი „ქართუ”. შესაბამისად, ყველა სახის თანხების მოთხოვნა და მოგროვება ცოტნესთვის არის პროვოკაცია როგორც მინიმუმ და ამორალიზმი იმათი მხრიდან, ვინც ამას აკეთებს. თხოვნაა არ შეხვიდეთ შეცდომაში“, - დაწერა გიორგი გამსახურდიამ.
ცნობისთვის, 2019 წლის 19 დეკემბერს საქართველოს პირველი პრეზიდენტის ვაჟი ცოტნე გამსახურდია დაჭრეს. ცოტნე მკურნალობის კურსს ამ დრომდე გადის.
ცოტნე გამსახურდია თბილისში, გალის ქუჩაზე, 2019 წლის 19 დეკემბერს დაჭრეს. ის ამის შემდეგ კომაშიც იყო. სასამართლომ კვირას აღკვეთის ღონისძიების სახით პატიმრობა შეუფარდა ცოტნე გამსახურდიას მკვლელობის მცდელობისა და დანაშაულის შეუტყობინებლობის ბრალდებით დაკავებულ 4 პირს, ხოლო ამავე საქმეზე დანაშაულის შეუტყობინებლობის ბრალდებით დაკავებული ერთი პირი აღკვეთის ღონისძიების გარეშე დატოვა.
