თბილისში, ცირკის ახლომდებარე ტერიტორიაზე არასრულწლოვანი გეი ბიჭი გააუპატიურეს. შემთხვევა 12(13) აგვისტოს გვიან ღამით მოხდა.

როგორც დაზარალებული ჰყვება, გუშინ გვიან ღამით ცირკთან ნასვამ მდგომარეობაში მეგობრებთან ერთად იმყოფებოდა, მან თავი ცუდად იგრძნო, შევიდა ტყეში და სწორედ იქ დახვა მოძალადე და გააუპატიურა.

"ყველა ნასვამები ვიყავით, თავი ვიგრძენი ცუდად, მქონდა გულისრევის შეგრძნება და ამიტომ შევედი იქვე ტყეში, ამ დროს ვიღაც მოვიდა და დამიწყო კოცნა, მე ვთხოვდი, თავი დაენებებინა, შემდეგ გონება დავკარგე და როდესაც გონზე მოვედი, სრულიად შიშველი, ნათრევი ვიყავი, სხეულზე იარები მაქვს, ამ ადგილზე მეგობრებთან ერთად ხშირად ვარ ხოლმე, ეს არის ჩვენი თავშეყრის ადგილი. როგორც ჩანს, ადრეც იყო ჩემთან მოსული და უარი რომ ვუთხარი, ალბათ დამდევდა. ჩემს მეგობართანაც ყოფილა რამდენჯერმე მისული და ფსიქოლოგიური პრობლემები ქონია“, -აცხადებს დაზარალებული.

ტვ-პირველთან საუბრისას ტრანსგენდერმა ქალმა განაცხადა, დაკავებული ცირკის მიმდებარე ტერიტორიაზე ხშირად უნახავთ.

„ფაქტია, რომ ეს პიროვნება იქ ხშირად დადის ხოლმე, თვითონვე აღიარა, რომ ჩემს მეგობარს რამდენჯერმე შესთავაზა ფულის სანაცვლოდ სექსი. მიუხედავად იმისა, რომ არასრულწლოვანი იყო, მაინც სთავაზობდა სექსს. ახლა კი, როდესაც არაფხიზელ მდგომარეობაში დაინახა, დრო იხელთა“, -განაცხადა მან.

მისვე თქმით, მის მეგობარს ჰქონია შემთხვევები, როდესაც სახლამდე ვიღაც მიყოლია მანქანით. ის სახლში ვერ შედიოდა იმის გამო, რომ მერე ის სახლს დაინახავს და იქ დაუწყებს ყარაულობას. საზოგადოება კიდევ ერთხელ უნდა დაფიქრდეს, ვინ არის ავადმყოფი და გარყვნილი- ჩვენ, თუ ეს ხალხი, რომლებიც სიცოცხლესაც გვიზღუდავენ“, -ამბობს ტრანსგენდერი ქალი.

შინაგან საქმეთა სამინისტროს ინფორმაციით, დანაშაულში ბრალდებული, 34 წლის მამაკცი გუშინ ღამესვე, ცხელ კვალზე დააკავეს.

საქმე სისხლის სამართლის კოდექსის 137-ე მუხლით არის აღძრული, რაც გაუპატიურებას გულისხმობს. დანაშული 6-დან 8 წლამდე თავისუფლების აღკვეთით ისჯება.