ხშირად ვაწყდებით სიტუაციას, როდესაც დასახული მიზნისთვის საკმარისი თანხა არ გვაქვს. რას ვაკეთებთ ამ დროს? გვაქვს რამდენიმე ვარიანტი:

ვთხოვოთ ჩვენს მეგობარს.

მივმართოთ ბანკს

ვისესხოთ კერძო პირისგან (მევახშისგან)

შესაძლოა მეგობარს საკმარისი თანხა არ ჰქონდეს, კერძო პირი სესხს საეჭვო პირობით და მაღალ პროცენტში გვთავაზობს (ამ თემაზე აუცილებლად ვისაუბრებთ მომდევნო სტატიებში) ასე რომ, ყველაზე ოპტიმალური ვარიანტია კომერციულ ბანკს ვთხოვოთ ფინანსური დახმარება. ბანკის ვებგვერდზე მრავალფეროვან ინფორმაციას ვიხილავთ, ბუნებრივია უმეტესად პროდუქტების დადებით მხარეებზეა ხაზი გასმული, დღეს მინდა ყველა შესაძლო მხრიდან განვიხილოთ ყველაზე მოთხოვნადი საბანკო შეთავაზებები.

სანამ უშუალოდ განხილვას დავიწყებთ, პირველ რიგში მინდა იმ ტერმინებზე გავამახვილო ყურადღება, რომლებიც ბანკში ვიზიტის, სესხის პირობების ახსნისას და ასევე ხელშეკრულებაშიც ხშირად შეგხვდებათ და ძალიან მნიშვნელოვანია:

წლიური ნომინალური საპროცენტო განაკვეთი - არის საპროცენტო განაკვეთი, რომელიც უშუალოდ სესხის ძირს (ნასესხებ თანხას) ერიცხება. პირობითად თუ ავიღეთ 1000ლარი წლიურ ნომინალურ 10% ში მას დაერიცხება დამატებით 10% წლის განმავლობაში.

წლიური ეფექტური საპროცენტო განაკვეთი - არის საპროცენტო განაკვეთი, რომელშიც გათვალისწინებულია ყველა არსებული ხარჯი, რომელიც შესაძლოა სესხის მომხარებასთან იყოს კავშირში, როგორიცაა: სესხის გაცემის საკომისიო (საფასური, რომელსაც ბანკს სესხის აღებაში ვუხდით. ის ძირი თანხის 0.5 დან 2 პროცენტამდე მერყეობს), სესხის წინსწრებით დაფარვის საკომისიო, ანგარიშის მომსახურების ყოველთვიური საკომისიო, შესაძლოა ამ ჩამონათვალს დაემატოს თქვენი საკრედიტო მონაცემების გადამოწმების საფასური. მაგალითად: წავედით მაღაზიაში ვაშლის საყიდლად, 1კგ ვაშლში გადავიხადეთ 1ლარი, მაგრამ აღმოჩნდა რომ ჩანთა სახლში დაგვრჩა და შევიძინეთ ერთჯერადი პარკი, რომელშიც გადავიხადეთ 10თეთრი. რა დაგვიჯდა ვაშლი საბოლოოდ? 1ლარი და 10თეთრი. სხვა სიტყვებით რომ ვთქვა ეს არის სესხის რეალური ღირებულება და სწორედ ამ მონაცემით უნდა ისარგებლოთ, როდესაც ორ სასესხო პროდუქტს ერთმანეთს ადარებთ და გსურთ დაადგინოთ: რომელია უფრო იაფი?

თანხის უაქცეპტო წესით ჩამოჭრა - იგივეა, რაც თანხის ჩამოჭრა წინასწარი გაფრთხილების გარეშე. შესაძლოა გამოყენებული იყოს სესხის ვადაგადაცილების, ან სხვა ნებისმიერი სავალდებულო საკომისიოს ჩამოჭრის დროს, მაგალითად დაზღვევის საკომისიოს.

სესხის წინსწრებით დაფარვის საკომისიო - საკომისიო, რომელსაც ბანკს დადებული პირობის დარღვევაში ვუხდით. დიახ, დიახ, წინსწრებით დაფარვაც პირობის დარღვევაა, რადგან ბანკს გათვლილი აქვს რამდენი შემოსავალი უნდა მიიღოს ჩვენი სესხიდან. პირობითად 24თვის განმავლობაში უნდა ვიხადოთ პროცენტი, მაგრამ უეცრად სესხი 13თვეში დავფარეთ. ბანკმა დაკარგა 11თვის პროცენტი და ამისთვის ჩვენ დარჩენილი ძირი თანხის 0.5 დან 2% მდე თანხას ვიხდით.

იპოთეკური სესხი

იპოთეკური სესხი არის უძრავი ქონების (ბინა, აგარაკი, მიწის ნაკვეთი) შესაძენად, გასარემონტებლად ან ასაშენებლად განკუთვნილი სესხი. შესაბამისად მას აქვს კონკრეტული მიზნობრიობა და იპოთეკურ სესხს ვერ ავიღებთ პირობითად სამოგზაუროდ წასასვლელად ან სასურველი მობილური ტელეფონის საყიდლად. მაქსიმალური თანხა, რომელიც შეგიძლიათ ისესხოთ, დამოკიდებულია თქვენს შემოსავლებზე გაითვალისწინეთ! აუცილებლად უნდა გიფიქსირებოდეთ დადასტურებული შემოსავალი (ხელფასი, გზავნილი ან ქირის თანხა, რომელიც ირიცხება ანგარიშზე შესაბამისი დანიშნულებით), ასევე იმაზე თუ როგორ იხდით სესხებს ანუ როგორი საკრედიტო ისტორია გაქვთ (საკრედიტო ისტორიაზე მოქმედ ფაქტორებს აუცილებლად შევეხებით მომდენო სტატიებში) საპროცენტო განაკვეთი საშუალოდ წლიური 8% დან იწყება კანონის თანახმად, 200 000 ლარამდე სესხის აღება მხოლოდ ლარში შეგიძლიათ ასე რომ, თუ თქვენი ქონების ღირებულება 200 000 ლარს სცილდება მხოლოდ ამ შემთხვევაში შეგიძლიათ ისარგებლოთ იპოთეკური სესხით დოლარში, სხვა შემთხვევაში ისარგებლებთ ეროვნული ვალუტით. იპოთეკური სესხით სარგებლობისას უნდა გავითვალისწინოთ ხარჯები : საპროცენტო განაკვეთი, ეფექტური საპროცენტო განაკვეთი, სესხის გაცემის საკომისიო, საჯარო რეესტრის ან ნოტარიუსის ხარჯი, უძრავი ქონების დაზღვევის საკომისიო, მსესხებლის სიცოცხლის დაზღვევის საკომისიო, წინსწრებით დაფარვის საკომისიო შესაძლოა ბანკმა დამატებით დააწესოს სხვა საკომისიოც, მაგრამ ძირითად აღნიშნული პუნქტებია გასათვალისწინებელი. იპოთეკური სესხი უზრუნველყოფილია უძრავი ქონებით, ეს ნიშნავს რომ სესხის ვერ გადახდის შემთხვევაში ბანკს უფლება აქვს გაყიდოს თქვენი ქონება და ასე დაიუბრუნოს კუთვნილი თანხა სწორედ ეს არის აღნიშნული პროდუქტის რისკი, დადებითი მხარეა ის, რომ შეგვიძლია სულაც გავაქირავოთ ნაყიდი ფართი, გადავიხადოთ სესხის თანხა და ვადის ბოლოს ჩვენ კვლავ დაგვრჩება უძრავი ქონება და ეს იქნება ჩვენი ინვესტიცია.

სამომხმარებლო სესხი

იპოთეკური სესხისგან განსხვავებით სამომხმარებლო სესხი შედარებით მარტივი პროდუქტია მას არ აქვს კონკრეტული მიზნობრიობა და შეგვიძლია გამოვიყენოთ: სწავლის დასაფინანსებლად, სამოგზაუროდ, სასურველი ტექნიკის შესაძენად და აშ... სამომხმარებლო ტიპის სესხი მოკლევადიანია, მაქსიმუმ 48თვიანი, და არ სჭირდებათ უზრუნველყოფა, გაითვალისწინეთ! 1იანვრიდან შემოსული რეგულაციების თანახმად, რომელსაც აუცილებლად შევეხები მომდევნო სტატიებში, აუცილებელია შემოსავლის დადასტურება დოკუმენტირებულად ახერხებდეთ. სამწუხაროდ, დაუდასუტრებელი შემოსავლით მაგალითად: რეპეტიტორობა, ტაქსის მძღოლობა, ძიძობა და ნებისმიერ ისეთი სამუშაოს დროს, როდესაც თანხას ხელზე იღებთ და ბუნებრივია აღნიშნული თანხა ვერც შემოსავლების სამსახურში და ვერც საბანკო ამონაწერში გამოჩნდება სესხს ვერ მიიღებთ. სამომხმარებლო სესხის აღების დროსაც შესაძლოა მოგთხოვონ სიცოცხლის დაზღვევა. სესხის აღებამდე წინასწარ გათვალეთ თქვენი შესაძლებლობები, დააკვირდით ეფექტურ საპროცენტო განაკვეთს და წინასწარ გაეცანით რა ბერკეტები არსებობს თქვენს წინააღმდეგ თუ სესხს ვერ გადაიხდით. მაგალითად: თუ სესხი იმავე ბანკში გაქვთ, რომელშიც ხელფასი გერიცხებათ შესაძლოა ვადაგადაცილების შემთხვევაში თქვენგან დამოუკიდებლად, თქვენი თანხმობის გარეშე, ჩამოგაჭრან სესხის დასაფარად საჭირო თანხა.

დღეისათვის სულ ეს იყო, რა თქმა უნდა არსებობს სხვა სასესხო პროდუქტებიც (სახელფასო ოვედრაფტი, საკრედიტო ბარათი, სადებეტო ბარათი, განვადება, ბიზნეს სესხი და აშ ...) რომლებზეც შემდეგ სტატიაში ვისაუბრებ.