როგორც ყოველთვის, ჩემი საყვარელი საქართველო გადარჩება! გაიხსენეთ, ხალხო, საქართველოს რუკა, რომელზეც აღნიშნული მაქვს, თუ როგორი ენერგეტიკა იცავს საქართველოს. ჯერ კიდევ1987 წელს ვიხილე, თუ როგორ იფშვნებოდა საქართველოს ირგვლივ კომუნისტური ბეტონი, თუ როგორ სცილდებოდა რუსეთი საქართველოს, და ვიხილე ქვიშასავით მრავალი ბავშვი, დაბადება ქართველთა და მთელი საქართველო იყო გაბრწყინებული ღვთის სხივის ქვეშ.

წინასწარმეტყველება არის დიდი სიმართლე, მომავლის იმედი და სწორი გზა. ის ხალხს უყვარს და სჯერა მისი, ხალხს, რომელიც კარგად არჩევს, სად არის სიკეთე და სად — ბოროტება. სიმართლის დამნახავი ადამიანები გაიმარჯვებენ და მომავალიც მათია. ბოროტება კი გონებას უბინდავს ადამიანებს, შური და ბოღმა მოახრჩობს ასეთებს და ყველა სიკეთეს დაკარგავენ, რაც კი გააჩნდათ. ბოროტება ყოველთვის მჟღავნდება, სიმართლე კი გზას ასრასდროს კარგავს.

დიახ, ეს წინასწარმეტყველებაა და ყოველივე ასრულდება, წერტილიც კი არ მოაკლდება და ამას მთელი მსოფლიო იხილავს.

ბოლო ერთია, იცოდეთ: რუსეთი, ვხედავ, დიდ პოლიტიკას წააგებს არა მარტო საქართველოსთან, არამედ მსოფლიოსთან მიმართებაში. ასეა, ნუ გაუთხრი სამარეს სხვას, თორემ თავად აღმოჩნდები შიგ. ასე დაემართება სხვა ბევრსაც.

მინდა, ისევ გავიმეორო ათასჯერ ნათქვამი: საქართველო იბრუნებს რუსეთის მიერ წართმეულ ტერიტორიებს; მათ შორის იმ ტერიტორიებსაც, რომლებიც სხვა სახელმწიფოებს დაურიგა. ვგულისხმობ სომხეთსა და აზერბაიჯანს. ამ თემაზე წარსულში ვიწინასწარმეტყველე და ეს ასი პროცენტით ასრულდება, როგორც ყოველთვის.

საქართველომ საკუთარი პოლიტიკა უნდა გაატაროს მყარად. ქართველებმა ვიცით, რა სურს საქართველოს და არასამთავრობო ორგანიზაციების „კეთილი სურვილები“ ჩვენ არ გვჭირდება; არც ევროპის კარნახი. თვითონ არიან ჩიხში მომწყვდეულები. არ უნდათ, რომ რუსეთმა საქართველოს ომი გამოუცხადოს, რადგან ეს მათ იმიჯს დაარტყამს, მაგრამ არც ის სურთ, რომ საქართველო ფეხზე დადგეს, აქაოდა, რუსეთს არ ეწყინოსო. ასეთი პოლიტიკა რუსეთს ძალას აძლევს იმ გადაწყვეტილებაში, რომ დაარტყას ევროპას და ძველი დიდება დაიბრუნოს. მაგალითად, ისევ აუშენოს გერმანელებს ბერლინის კედელი ცხვირწინ, საბჭოთა კავშირის აღდგენა დაიწყონ სწორედ ევროპიდან. ამის ნიშნები დღეს ძალიან ბევრია. ამას ევროპაც ხედავს, მაგრამ ვერაფერს ვერ აკეთებს, გარდა იმისა, რომ კრემლს უძვრება. თუმცა ევროპის ქვეყნები იმავდროულად ელოდებიან მომენტს, რომ რუსეთი ძირფესვიანად მოთხარონ.

პოლიტიკოსების დიდ ხმაურს მერის არჩევნებთან დაკავშირებით, ვხედავ, ხალხი გულგრილად უყურებს. აღარ არის ის მუხტი, რაც წარსულში იყო. ხალხს არ სურს გარეთ გამოსვლა და ქუჩაში დგომა, მით უმეტეს, რომ ოპოზიციას არ ენდობა. მოსკოვურმა ვოიაჟებმა, ოპოზიციის დიდი ნაწილის სირბილმა პრეზიდენტთან, ხალხი მთლად გააგიჟა. თავს ნუ მოიტყუებთ, საზოგადოების 90 პროცენტი ოპოზიციას უნდობლობას უცხადებს.

ვხედავ, ოპოზიციაში დიდი ომი ატყდება. კი, ისედაც დაყოფილები არიან, გაერთიანება ზღაპარია, მაგრამ მუშტიკრივზეც გადავლენ და მრავალ სხვა სიურპრიზსაც ელოდეთ, ჩემო ქართველებო!

მთავრობა კი მამა აბრამის ბატკანივით წყნარად უთვალთვალებს ოპოზიციას და მოვლენებს არ უსწრებს. მოკლედ, ელოდებიან თავად როდის ჩაირეცხავენ თავებს. მაგალითად თუნდაც ის კმარა, რაც საკნებთან დაკავშირებით მოხდა, როცა ოპოზიციამ თავისი ხელით აალაგა საკნები. იყო მრავალი გეგმა, მაგრამ თავი ვერაფერს მოაბეს.

ერთი სიტყვით, რუსეთი საქართველოში წააგებს. ყველას ბოლომდე აეხდება ნიღაბი. ხალხს არავისკენ გახედვა არ სურს. ხალხი ელოდება ახალ, ჯანსაღ, ნამდვილ ქართულ ძალას, მართლა პოლიტიკოსებს, თავისი საქმის მცოდნე მეცნიერებს და ეს აუცილებლად მოხდება.

განსაკუთრებით მაგონდება ერთი უმნიშვნელოვანესი წინასწარმეტყველება 1992 წლის19 ოქტომბრისა, რომ რუსეთი იძულებული გახდება, დათმოს აფხაზეთი და ასევე სამაჩაბლოც; რომ რუსეთის ჯარი აქეთ დაეხმარება საქართველოს. ახლა კი ერთმა „დიდმა პოლიტიკოსმა“ მიითვისა ეს წინასწარმეტყველება. მაგრამ ხალხი ბრძენია, ბატონებო! ისინი კარგად არჩევენ შავს თეთრისგან. ასეა, ყველა იპარავს და ითვისებს ჩვენს წინასწარმეტყველებებს, მაგრამ არაფერი გამოგივათ. კოსმოსი ერთ სიტყვასაც არ შეგარჩენთ, შადიმანებო!

ჩვენ გარკვევით ვხედავთ მომავალს. ის, რაც დღეს ხდება, ყველაფერი 20-25 წლის წინ ვიწინასწარმეტყველეთ. ვიცი, რაც მოხდება შორეულ მომავალშიც. რატომღაც მოვინდომე ამის თქმა, თუმცა ვიცი, რომ ეს ყველაფერი ჩემმა საყვარელმა მკითხველმა ზეპირად იცის.

დიახ, რუსეთი რომ აფხაზეთს თავისი ხელით გვიბრუნებს, მე — ლელა კაკულიამ, ზუსტად 18 წლის წინ ვიწინასწრამეტყველე და ხშირად ვიმეორებ.

ვიცი, რომ წიგნი, რომელსაც გამოვცემთ, მეტად საინტერესო იქნება არა მარტო საქართველოსთვის, არამედ მთელი მსოფლიოსთვის და ყველა აღიარებს, რომ ჩემს წიგნს დიდი მნიშვნელობა აქვს. მასში თავმოყრილია ყველა მნიშვნელოვანი წინასწარმეტყველება, ნამდვილად ჭკვიანი პოლიტიკოსების უზარმაზარი არმიის სურათების დიდი გალერეა, მათ შორის, უცხოელებისაც და მრავალი სხვა რამაც.

დღევანდელ ზოგ პოლიტიკოსს, რომელთაც ამბიციები აწუხებთ, რეალურად კი მათი ფასი ნულის ტოლია პოლიტიკაში, ელემენტარული კულტურა არ გააჩნიათ, სხვაზე აღარ ვლაპარაკობ. ჰოდა, მათ თამაშს მალე დაესმება წერტილი. ამინ! ხოლო იმ პოლიტიკოსებს, ვისთანაც შეხება მქონია, ვერცერთი შეედრებით ვერც ინტელექტით, ვერც საქმის ცოდნით, ვერც ნიჭიერებით, ვერც თანამდებობებითა და ვერც მრავალი სხვა თვისებით, განსაკუთრებით კი, პოპულარობით.

ასეა, განათლებულ და ნიჭიერ გონებას კარგად ესმის, რა არის კოსმოსი და კოსმიური ენერგია, აფასებს და უფრთხილდება, ყურს უგდებს და სწავლობს წინასწარ დანახულ მოვლენებს, რომლებიც მთელი მსოფლიოს ქვეყნებს, სახელმწიფოებსა და ხალხს ეხება.

ახლა, რაც შეეხება დედამიწას: არავითარი ღერძის გადახრას არ ვხედავ! მე წლების წინ ვიწინასწარმეტყველე, რომ ბუნება არ აპატიებს ადამიანებს იმ ზიანს, რომელსაც აყენებენ. აი, თუნდაც ის, რომ ჩერნობილი დღემდე ჟონავს. და რამდენი ასეთი დამალული ჩერნობილი, ატომური სადგურები და მრავალი სამხედრო აფეთქებაა?! ამას ემატება ხეების მასიური ჭრა, ცეცხლისგან განადგურებული ტყის უზარმაზარი მასივები. როგორც ეპყრობი, ადამიანო, ბუნებას, ისიც იმგვარ პასუხს გცემს. გაფრთხილებთ, ბუნება არ დაგინდობთ, რადგან მთელი დედამიწა გადათხარეთ!

აქვე მინდა აღვნიშნო, რომ დედამიწა კოსმოსში არსებობდა, არსებობს და იარსებებს. დედამიწა კი არ ქრება, ქრებიან ადამიანები. წყალდიდობები, მიწისძვრები, მეწყერები, ომები — აი, რა ანადგურებს მათ. საკუთარი ხელით ითხრიან სამარეს! არც ბაქტეოროლოგიური და ქიმიური ომები დაგავიწყდეთ. ჰოდა, მეტი რაღა გინდათ? ადამიანებო, გონს მოეგეთ! თუმცა ეს ბედისწერაა!

რამდენიმე წლის წინ ვიწინასწარმეტყველე ის, რაც დღეს ხდება საქართველოში და ეჭვიც არ შეგეპაროთ, რომ ყველაფერი, როგორც ყოველთვის, ასრულდება ასი პროცენტით.

ვხედავ, ამერიკა მოულოდნელ პოლიტიკურ ნაბიჯებს გადადგამს და ეს დიდი დარტყმა იქნება რუსეთისთვის. საქართველოს არ შეეხება არაფერი. ეს მხოლოდ ამერიკა-რუსეთის ინტერესების შეჯახებაა. ვხედავ, ეს მართლაც სერიოზული, ძალზე სერიოზული, მართლა პოლიტიკური ომია.

სხვათა შორის, იმ საკითხებს, რომელთაც ამერიკა აქამდე არ წყვეტდა საქმიანად საქართველოსთან დაკავშირებით, მოულოდნელად გადაწყვეტს. აქ მოლაპარაკებები და შეხვედრები, ვხედავ, არაფრის მომტანია. რუსეთი თავის გეგმებს ანხორციელებს და უკან არ იხევს. იგი საქმიანად მოქმედებს; ხოლო ამერიკული მოლაპარაკებები არაფრის მომტანია და თუ შეერთებული შტატები არ გადაგამს მყარ პოლიტიკურ ნაბიჯებს, ანუ არ დაიწყებს მოქმედებას, იგი წააგებს! თუმცა მომავალში, ვხედავ, ამერიკას თვითონ რუსეთი გახდის იძულებულს, გადაწყვეტილებები სისრულეში მოიყვანონ. ასევე ევროპა, რომელიც დღეს უძვრება რუსეთს, მოულოდნელად უარყოფითად შეუბრუნდება და დიდ დარტყმას მიაყენებს მას. უბრალოდ, ევროპის ქვეყნებში მთავრობები იცვლება; მოდიან მთავრობები, რომლებიც რუსეთთან გარიგებაში არ შევლენ.

ძალიან ბევრი რამ შეიცვლება ასევე შეერთებულ შტატებშიც. დღევანდელი ამერიკული პოლიტიკა, ასე ვთქვათ, არ იცავს საქართველოს. მათმა პრეზიდენტმა არ იცის, რა სურს. დიახ, ეს ასეა. იგი ძალიან სუსტი პრეზიდენტია მათ შორის, ვინც კი ამერიკას ჰყოლია დაარსების დღიდან. ჰოდა, მალე მოიმკიან საკუთარი პოლიტიკის უარყოფით ნაყოფს.

ვხედავ, მოდიან „რესპუბლიკელები“, რაც ჰაერივით სჭირდება ამერიკას. დიახ, დღევანდელი მთავრობა საერთოდ ვერ წყვეტს უმნიშვნელოვანეს საკითხებს, ისინი მხოლოდ ლაპარაკობენ და მეტი არაფერი. ასეა ევროპის ერთი ნაწილიც, მაგრამ მალე ყველაფერი შეიცვლება.

რუსეთი თავის გეგმებს საქართველოში ვერ განახორციელებს. ეს წინასწარმეტყველებაა და უნდა ასრულდეს! საქართველო, ვხედავ, თავის პოლიტიკას მაინც გაატარებს ევროპაშიც და ამერიკაშიც. არაფერს არ დავუთმობთ მათ. ჩვენ უკეთ ვიცით, რა გვინდა ჩვენი ქვეყნისთვის და როგორ უნდა ვიმოქმედოთ. თუ თავად არ გავინძრევით, არავინ არაფერს არ გაგვიკეთებს. ასეა, საჭიროა ბრძოლა არსებობისათვის და ჩვენ გავიმარჯვებთ ასი პროცენტით! აუცილებლად აღდგება საქართველოს ტერიტორიული მთლიანობა, აუცილებლად შევალთ ნატოში და მოხდება ბევრი სხვა რამ, რაც სიკეთეს მოუტანს ჩემს ქვეყანას. ეს ასეა ასი პროცენტით.

ვიმეორებ: ამერიკამ პოლიტიკური კურსი უნდა შეცვალოს. თვითონ ამერიკელი პოლიტიკოსები ლაპარაკობენ, ვხედავ, რომ მათ აფროამერიკელ პრეზიდენტს პოლიტიკისა საერთოდ არაფერი ესმის, რომ პოლიტიკა მისგან ძალიან შორსაა და რომ დაძაბულობებმა და ომებმა იგი ძალიან დაღალა, არავითარი მკვეთრი გადაწყვეტილება, არავითარი რისკიანი ნაბიჯები და ა.შ.

მოკლედ, ამერიკა მოკავშირეებსაც აღიზიანებს, დიდ შეცდომებს უშვებს, არასწორ, გაუგებარ პოლიტიკას ატარებს. ამას ბევრი ქვეყანა აღიარებს.

დღეს ევროპის ბევრი სახელმწიფო, რუსეთის პოლიტიკის შემყურე, ამერიკას უჭერს მხარს და ყველანაირ შეთანხმებაზე თანახმაა, თუნდაც რაკეტების განლაგებაზე და ბევრ სხვა რამეზეც. ეს ის ყოფილი საბჭოთა ქვეყნები არიან, რომელთაც რუსულმა ჩექმამ გადაუარა და სისხლის გუბეები დააყენა. ევროპის ამ ქვეყნებს არანაირად არ აწყობთ რუსეთთან ურთიერთობა. ისინი არ ენდობიან რუსებს. მათთვის მშვენიერი მაგალითია საქართველოს ტერიტორიების ოკუპაცია და იმ ვალდებულებების შეუსრულებლობა, რომლებიც კრემლს სულაც არ ანაღვლებს და ევროპა-ამერიკის აზრს აბსოლუტურად არ იზიარებს. ასეა, გერმანიის, საფრანგეთისა და იტალიის მთავრობები, ვიმეორებ, რუსეთს უძვრებიან და მათი ვითომ მკაცრი მოთხოვნები – ეს თამაშია, რაც რუსეთმა კარგად იცის. ისინი ყოველდღე არღვევენ კანონებს ძალისმიერი მეთოდებით და არავინ უწყის, თუ რა სიურპრიზებს მოაწყობენ და რით გააკვირვებენ მსოფლიოს კრემლის ბინადარნი. თუმცა, ის წინასწარმეტყველებები, რომლებიც რუსეთზე დავინახეთ წარსულში, 20-25 წლის წინ, დღეს ნაბიჯ-ნაბიჯ სრულდება მთელი სიზუსტით და რუსეთს უდიდესი დარტყმა ელის უკვე ახლო მომავალში. რუსეთის სახელმწიფოს კოსმოსი ნიურნბერგის პროცესს მოუწყობს და ამას ვერავინ შეაჩერებს. ყველაფერი მოეკითხებათ კრემლის ბინადართ!

კავკასია – ეს ავღანეთი არაა. ზუსტად კავკასიის ომები დაასუსტებს რუსეთს და უდიდესი დარტყმას მიაყენებს. ყველაფერი სწრაფად ასრულდება, ჩრდილოეთ კავკასია აუცილებლად გაერთიანდება. ეს ჯერ კიდევ1992-1993 წლებში აღვწერე (იხ. ჟურნალში, გაზეთებსა და წიგნში) და წინასწარმეტყველება მთელი სიზუსტით ასრულდება. ხოლო გაერთიანების ცენტრი კი, როგორც დავწერე, იქნება თბილისი.

ამ დროისთვის ამერიკა უკვე არ აპირებს, რაიმე დაუთმოს გერმანიას, საფრანგეთსა და იტალიას რუსეთთან მიმართებაში, განსაკუთრებით, საქართველოს საკითხში. „რუსეთმა ერთმნიშვნელოვნად უნდა დატოვოს საქართველო და რუსის ჯარი უნდა გავიდეს ქვეყნიდან. არარსებული სახელმწიფოების ცნობა და საერთოდ, მთელი ეს ცირკი უნდა დამთავრდეს!“ — აღნიშნავს ამერიკის მთავრობა. თუ არა და, ვხედავ, ამერიკა დახურულ კარს მიღმა ძალიან მკაცრად მოსთხოვს ევროპას რუსეთისთვის მძიმე სანქციების დაწესებას. ეს მოთხოვნა კი არა, ვხედავ, ბრძანებაა. ვერც გერმანია, ვერც საფრანგეთი და ვერც იტალია ამერიკას წინააღმდეგობას ვერ გაუწევენ, მით უმეტეს, რომ ევროპის სხვა ქვეყნები მომხრეები იქნებიან ამ სანქციებისა. აი აქ იწყება უკვე ნამდვილი დიდი პოლიტიკა. რეალურად, რუსეთის მთავრობამ თავისი პოლიტიკით ევროპა-ამერიკას დაანახა, რომ ის „დიდი რუსეთია“ და სულაც არ აშინებს არც სანქციები და არც ურთიერთობების გაფუჭება; და საერთოდაც, რა პოლიტიკასაც მოინდომებს, იმ პოლიტიკას გაატარებს: „თქვენ ვინ გეკითხებათ, თქვენი….. ! არც ევროპა, არც ამერიკა და საერთოდ არავინ, არ დგახართ რუსეთის იმპერიაზე მაღლა!“ – ეს იქნება ისეთი ხმამაღალი განცხადება, რომ ვხედავ, ყველა გაოგნდება.

აი მაშინ კი იწყება, ვხედავ, დიდი პოლიტიკური ომები, რომელშიც რუსეთი წააგებს ასი პროცენტით.

მომავალში ევროპა, ვხედავ, დაიშლება. ეს იქნება გარდაუვალი პროცესი. ევროც არ იარსებებს, ყველა საკუთარ ფულის ნიშანს დაიბრუნებს. ევროპა ძველ სახეს იბრუნებს და ეს უფრო მისაღებია თავად ევროპული ქვეყნებისთვის. ვხედავ, გაერთიანებული ევროპა – ეს დიდი ხარჯია. ასევე უზარმაზარ ფინანსებთანაა დაკავშირებული იმ ორგანიზაციების არსებობაც, რომლებიც არც არაფერს აკეთებენ და კიდევ მრავალი სხვა საკითხი წამოიჭრება. ეს ყოველივე ასრულდება. სხვა გზა არ დარჩებათ ევროპელებს.

მოკლედ, მომავალში ძალიან ბევრი რამ შეიცვლება. მრავალ ქვეყანაში მთავრობათა თითქმის ერთდროულ ცვლას ვხედავ. ეს აუცილებელიცაა, განსაკუთრებით, გერმანიის, საფრანგეთისა და იტალიისთვის. მათმა პოლიტიკამ საერთოდ არ გაამართლა. მათ გამოიჩინეს სისუსტე, რამაც რუსეთს ხელი შეუწყო, მწვანე შუქი აუნთო აგრესიაში; ეს მათ მისცეს რუსეთს უფლება, ყოველგვარი თავხედობის ზღვარს გადაეცილებინათ საკუთარი პოლიტიკა. ბოლოს და ბოლოს, ჩვენ ვიხილეთ, როგორ აიგდო მასხარად რუსეთმა ევროსაბჭო, რომელსაც დედაც აგინეს და საქართველოს მიმართ აგრესიაც თავხედურად განაგრძეს – ვითომ მიითვისეს საქართველოს ტერიტორიები. ევროპის აზრი რუსეთს საერთოდ არაფრად უღირს და არც არაფრად მიიჩნევს. ჰოდა, მთელი სიზუსტით სრულდება 1992 წლის წინასწარმეტყველებები. გადახედეთ ჩემს გაზეთებს, ჟურნალსა და წიგნს და იქ იხილავთ პასუხებს ყველაფერზე, რაც დღეს ხდება და რაც მოხდება...