ტირანოზავრ რექსის კოსტიუმში გამოწყობილი პიროვნების იდენტიფიკაცია ვიდეომასალის მეშვეობით შეუძლებელია. მაგრამ როგორც ჩანს, ის პოლიციამ შეაჩერა და მხოლოდ გამოკითხა.

საქმე იმაშია, რომ პარასკევს ესპანეთის პრემიერმა პედრო სანჩესმა კორონავირუსის მასობრივი გავრცელების თავიდან აცილების მიზნით საგანგებო მდგომარეობა გამოაცხადა, რაც სახლიდან გარეთ გასვლას კრძალავს, თუ საამისოდ ძალიან დიდი აუცილებლობა არ დგას, კერძოდ კი თუ წამლის და მედიკამენტების ყიდვა არ გსურთ ან თუ ექიმთან არ მიდიხართ.

საგანგებო მდგომარეობის გამოცხადების დროს პატარა შენიშვნა გაკეთდა, რომ შინაური ცხოველების გასეირნება მოკლე დისტანციებზე ნებადართული იყო, მაგრამ ეტყობა, დინოზავრის კოსტიუმში გამოწყობილმა პიროვნებამ ყველაფერი არასწორად გაიგო. მას აშკარად ეგონა, რომ დაშვებული იყო მხოლოდ შინაური ცხოველების გასვლა სახლიდან გარეთ და ნაგვის ყუთთან მისასვლელად და მაღაზიის მოსანახულებლად პოლიციის მოტყუება სცადა, ვითომ დინოზავრი გახლდათ.

გავრცელებულ ვიდეოს პოლიციამ დაადო სტივენ სპილბერგის “იურული პერიოდის პარკის” საუნდტრეკი და ხუმრობით მაყურებლებს განუმარტა, რომ დინოზავრები არ შედიან შინაური ცხოველების კატეგორიაში და მათთან ერთად სეირნობა იკრძალება. ამავე ვიდეოში ხელისუფლების წარმომადგენლები სახლში დარჩენისკენ მოუწოდებენ ყველას.

ამასობაში კი მთელ პლანეტაზე კორონავირუსით დაინფიცირებულია 400 414 ადამიანი, საიდანაც 17 451 გარდაიცვალა, თუმცა ექსპერტები ამბობენ, რომ ეს ჯერ მხოლოდ დასაწყისია და ყველაზე უარესი კიდევ წინ გველოდება, რისი თავიდან აცილების ერთადერთი გზა სახლში დარჩენა და ხელების საპნით ხშირი და საგულდაგულო დაბანაა.