10 დღის შემდეგ ყველას განმეორებით ჩაუტარეს ტესტი და გაირკვა, რომ აქტიური ღონისძიების შედეგად დაავადებულთა რაოდენობამ 90 %-ით იკლო.

ვოში, სადაც კორონავირუსით გარდაცვალების პირველი შემთხვევა 22 თებერვალს დაფიქსირდა, ჯანდაცვის ადგილობრივმა ორგანოებმა სრულად მოახერხეს კორონავირუსის გავრცელების შეჩერება.

ანალოგიური რეკომენდაცია აქვს ჯანდაცვის მსოფლიო ორგანიზაციას. უწყების განცხადებით, კორონავირუსთან ბრძოლის ყველაზე ეფექტური სტრატეგია დაავადებაზე მოსახლეობის საყოველთაო და მასობრივი შემოწმებაა. WHO-ში წარმატებული შემოწმების მაგალითად ტაივანს და სამხრეთ კორეას ასახელებენ. ვო კი ამ მხრივ კიდევ ერთი წარმატებული მაგალითია.

საინტერესოა, რომ ვოში კორონავირუსი მოსახლეობის 3 %-ს აღმოაჩნდა. განსაცვიფრებელია, მაგრამ სიმპტომების მქონე თითოეულ პაციენტზე ვირუსის 10 ისეთი მატარებელი მოდიოდა, რომელსაც სიმპტომები არ ჰქონდა. მათი გამოვლენა მხოლოდ საყოველთაო შემოწმებით მოხერხდა.

აღნიშნული პრაქტიკის დანერგვას უკვე ვენეტოს მთელ რეგიონში აპირებენ, სადაც დღეში 11 ათას ადამიანს შეამოწმებენ.

ოთხშაბათს იტალიაში კორონავირუსით 3000 ადამიანი გარდაიცვალა. მთლიანად ქვეყანაში კი დაავადების 36 ათასი შემთხვევაა დაფიქსირებული, საიდანაც 4000 პაციენტი გამოჯანმრთელდა. იტალია მეორე ადგილზეა ჩინეთის შემდეგ იმ ქვეყნებს შორის, რომლებიც კორონავირუსმა ყველაზე მეტად დააზარალა. აქ საყოველთაო კარანტინი 9 მარტიდან მოქმედებს, თუმცა დაავადებულთა რიცხვი მაინც სულ უფრო იზრდება.