ჩინეთის მეცნიერების და ტექნოლოგიების მინისტრის ოფიციალური წარმომადგენელი, ჩჟან სინმინი ამბობს, რომ ფავიპირავირმა, რომელიც Fujifilm-ის შვილობილი კომპანიის მიერ არის შექმნილი, დადებითი შედეგები აჩვენა კლინიკური კვლევების დროს ვუჰანსა და შენჟენში, რომლებშიც 340 პაციენტი მონაწილეობდა.

“მას [პრეპარატს] აქვს უსაფრთხოების მაღალი ხარისხი და აშკარად ეფექტურია მკურნალობისთვის”, – განუცხადა ჟურნალისტებს ჩჟანმა სამშაბათს.

პაციენტებს, რომლებმაც მიიღეს სამკურნალო პრეპარატი, აღარ აღმოაჩნდათ ვირუსი მედიკამენტის მიღებიდან ოთხი დღის შემდეგ, ხოლო მათ, ვისაც არ მისცეს ფავიპირავირი, 11 დღე დასჭირდათ გამოჯანმრთელებისთვის.

გარდა ამისა, რენტგენოლოგიამ დაადასტურა ფილტვების მდგომარეობის გაუმჯობესება ავადმყოფთა დაახლოებით 91%-ში, რომელთაც მკურნალობდნენ ფავიპირავირით, ხოლო მათ, ვინც არ მიიღო აღნიშნული პრეპარატი, ფილტვის ფუნქცია გაუუმჯობესდათ შემთხვევათა მხოლოდ 62%-ში.

ფავიპირავირი 2014 წელს შეიმუშავა Fujifilm Toyama Chemical-მა.

ფირმის აქციების ფასი ოთხშაბათსვე, ჩინელი ჩინოვნიკის მიერ გაკეთებული განცხადების შემდეგ მთელი 14, 7 %-ით, 5238 იენამდე გაიზარდა.

იაპონელი ექიმები იყენებენ ფავიპირავირს კლინიკურ კვლევებში კორონავირუსულ პაციენტებზე, ვისაც მსუბუქი, ზომიერი სიმპტომები აღენიშნება. ამომავალი მზის ქვეყანაში იმედოვნებენ, რომ მედიკამენტი ხელს შეუშლის ვირუსის გავრცელებას პაციენტების ორგანიზმში.

მაგრამ იაპონიის ჯანდაცვის მინისტრის წყაროს განცხადებით, პრეპარატი არ იყო ეფექტური უფრო მწვავე სიმპტომების მქონე პაციენტების შემთხვევაში. “ჩვენ 70-დან 80-მდე ადამიანს ფავიპირავირი მივეცით, მაგრამ, როგორც ჩანს, ის არ მუშაობს, როდესაც ვირუსი უკვე მოდებულია ადამიანის მთელ ორგანიზმს”, – განაცხადა წყარომ.

“იგივე ეფექტი იქნა გამოვლენილი იმ კვლევებში, რომლებშიც კორონავირუსული პაციენტები მონაწილეობდნენ და სადაც შიდსის საწინააღმდეგო, ანტირეტროვირუსული ლოპინავირი გამოიყენეს”, – დასძენს წყარო.

2016 წელს, იაპონიის მთავრობამ ფავიპირავირი გვინეაში გაგზავნა, როგორც გადაუდებელი საჭიროების დროს გამოსაყენებელი პრეპარატი ემბოლას ვირუსის გავრცელების წინააღმდეგ.

ფავიპირავირს სჭირდება ხელისუფლების შესაბამის ორგანოთა მხრიდან დაშვება Covid-19-ის მქონე პაციენტებზე სრულმასშტაბიანი გამოყენებისთვის, რადგან ის თავდაპირველად გრიპის სამკურნალოდ იყო გამიზნული.

ამერიკის ჯანდაცვის სფეროს წარმომადგენელმა განაცხადა, რომ პრეპარატის ფართო გამოყენებაში დანერგვა შეიძლება მაისის დასაწყისში, მაგრამ თუ კლინიკური კვლევების შედეგები დაიგვიანებს, ფავიპირავირის დამტკიცებაც ანალოგიურად შეიძლება შეფერხდეს.