2020 წელი მთელი მსოფლიოსთვის საერთო შეკითხვით დაიწყო - ხომ არ იწყება ახალი ომი? ხომ არ მოხდება პირდაპირი სამხედრო დაპირისპირება შეერთებულ შტატებსა და ირანს შორის? ხომ არ შეუწყობს ეს ხელს მესამე მსოფლიო ომის დაწყებას?

ირანელი გენერლის მკვლელობას ირანის მხრიდან უკვე მოჰყვა პასუხი - წუხელ, თბილისის დროით 2:30-ზე ირანმა ერაყში არსებული ამერიკული სამხედრო ბაზები დაბომბა. თავდასხმისთვის ბალისტიკური რაკეტები გამოიყენეს.

ირანული მედიის მიხედვით, მათ 15 რაკეტა ისროლეს და არსებული ინფორმაციით, სულ მცირე 2 ბაზა დაიბომბა, ერთი ერბილში მდებარეობს, მეორე კი ალ-ასადის ავიაბაზაა.

ფორმალური, თუმცა მაინც საინტერესო იყო ირანის პარლამენტის 7 იანვრის გადაწყვეტილება, რომლის მიხედვითაც, მათ პენტაგონი და შეერთებული შტატების სამხედრო ძალები, ასევე მათთან დაკავშირებული ორგანიზაციები ტერორისტებად აღიარეს.