ყველაზე მოკლე მოთხრობები მსოფლიოში(ნაწილი 2)

პროზა

2019, 5 ოქტომბერი, 11:32

უიღბლო

მთელს სხეულში დავლილმა ძლიერმა ტკივილმა გამაღვიძა. თვალები გავახილე და საწოლთან მდგარი მედდა დავინახე.

-მისტერ ფუჯიმა- თქვა მან, -თქვენ გაგიმართლათ, ორი დღის წინ დაბომბილ ჰიროსიმას ცოცხალი გადაურჩით, ახლა საავადმყოფოში ხართ, თქვენ აღარაფერი გემუქრებათ.

სისუსტისგან მისავათებულმა ვკითხე:

- სად ვარ?

-ნაგასაკში-მიპასუხა მან.

ალან მაიერი

სიმართლე

დაბოლოს, მისი ძიება დასრულდა ამ შორეულ, მიყრუებულ სოფელში, ძველ ქოხში კოცონთან იჯდა "სიმართლე".
არასდროს უნახავს ასეთი ბებერი და მახინჯი ქალი.
- მართლა შენ ხარ?
მოხუცმა დანაოჭებულმა დედაბერმა საზეიმოდ თავი დაიქნია .
- მითხარით, რა გადავცე მსოფლიოს? რას ამცნობდით?
მოხუცმა ცეცხლისკენ გადააფურთხა და უპასუხა:
-უთხარით, რომ ახალგაზრდა და ლამაზი ვარ!

რობერტ ტომპკინსი

"ვერცხლის ტყვია"

გაყიდვები ბოლო ექვს კვარტალში დაეცა. საბრძოლო მასალების ქარხანამ კატასტროფული ზარალი განიცადა და გაკოტრების პირას იყო.

აღმასრულებელ დირექტორს, სკოტ ფილიპსს წარმოდგენა არ ჰქონდა, რაში იყო საქმე, აქციონერები ალბათ ყველაფერში მას დაადანაშაულებდნენ.

გახსნა უჯრა, ამოიღო რევოლვერი, მომართა, საფეთქელთან მიიდო და სახლეტს თითი გამოჰკრა...არ გავარდა.
”მაშ ასე, უნდა ვიზრუნოთ პროდუქციის ხარისხის კონტროლზე.”

ბრედ ჰიპკინსი

და იყო სიყვარული

და ერთხელ დიდი წარღვნა მოვიდა.. და ნოემ თქვა:
” ყველა არსება კიდობანში - მაგრამ მხოლოდ წყვილები!”

სიყვარულმა მეწყვილეს ძებნა დაიწყო - სიამაყეს, სიმდიდრეს,
დიდებას, სიხარულს, ყველას უკვე ჰყავდა თანამგზავრი.
შემდეგ მივიდა მასთან განშორება და უთხრა:
"მიყვარხარ".
სიყვარული სწრაფად ჩახტა მასთან ერთად კიდობანში.

განშორებას რეალურად შეუყვარდა სიყვარული და არ
სურდა მასთან განშორება დედამიწაზეც კი.

ახლა კი, "სიყვარულს" ყოველთვის მოსდევს "განშორება" ...

ჭუჭყიანი თეთრეული

ახალდაქორწინებული წყვილი საცხოვრებლად ახალ ბინაში გადავიდა. დილით, ახალგაღვიძებულმა ცოლმა ფანჯარაში გაიხედა და დაინახა მეზობელი, რომელიც თოკზე თეთრეულს ფენდა.

”შეხედე, რა ბინძური თეთრეული”, - უთხრა ქმარს. იგი გაზეთს კითხულობდა, ყურადღება არც მიუქცევია.

”მას, ალბათ ცუდი საპონი აქვს, ან საერთოდ არ იცის რეცხვა. უნდა ვასწავლო"-დაიკვეხა ცოლმა.

ასე ყოველ ჯერზე, როდესაც მეზობელი კიდებდა სარეცხს, ცოლი გაოცებას ვერ მალავდა, რამდენად ბინძური იყო ის.

ერთ დილას, ფანჯარაში გაიხედა და წამოიძახა: ”ოჰ! დღეს თეთრეული სუფთაა! ალბათ ისწავლა გარეცხვა! ”
- არა, - უპასუხა ქმარმა, - დღეს დილით ადრე ავდექი და ჩვენი ფანჯარა გავწმინდე.