თურქეთი რუსულ საზენიტო-სარაკეტო კომპლექს С-400-ს ივლისის თვიდან მიიღებს, ამის შესახებ განცხადება თურქეთის პრეზიდენტმა რეჯეფ ტაიფ ერდოღანმა გააკეთა, იუწყება სააგენტო Anadolu.

თურქეთის ლიდერმა ხაზი გაუსვა იმ ფაქტს, რომ კონტრაქტი С-400 -ის შეძენაზე თურქეთის სუვერენული უფლებაა და არ აპირებს უკან დახევას.

პარალელურად ინდოეთმაც განაცხადა, რომ აპირებს რუსული საზენიტო-სარაკეტო კომპლექსის შეძენას და ეს ინფორმაცია "მკაფიოდ უნდა მივიდეს" აშშ-ს სახელმწიფო მდივნის მაიკ პომპეოს ყურამდე.(კონტრაქტი 2018 წლის 5 ოქტომბერს გაფორმდა)

როგორც ცნობილია, დონალდ ტრამპი დაემუქრა თურქეთს, თუ რუსულ С-400-ს შეიძენდა, შეუზღუდავდა ამერიკული გამანადგურებლის F-35 -ის მიწოდებას და დამატებით სანქციებსაც დაუწესებდა.

ერდოღანს თავის მხრივ არ სჯერა, რომ ამერიკა სანქციებს შემოიღებს თურქეთის წინააღმდეგ და აქეთ დაემუქრა საერთაშორისო სასამართლოთი, თუ F-35 -ზე დადებულ გარიგებას ჩაშლის.

ერდოღანმა იმასაც ხაზი გაუსვა, რომ რუსული საზენიტო-სარაკეტო კომპლექსის შეძენა გადაწყვეტილი საკითხია.

ამერიკას და ნატოს ქვეყნებს იმის შიში აქვთ, რომ თუ თურქებს ერთდროულად ექნებათ С-400 და F-35, რუსული რადარული სისტემა შეძლებს გამოთვალოს და კვალში ჩაუდგეს ამერიკულ ავიაგამანადგურებელს.

ხელშეკრულების თანახმად რუსეთი თურქეთს С-400 -ის ოთხ დივიზიონს მიაწვდის, რომლის საერთო ღირებულება 2, 5 მილიარდი დოლარია, ამ თანხის ნახევარი რუსული კრედიტით დაიფარება.