20 ივნისს, საქართველოს პარლამენტში მართლმადიდებლობის საპარლამენტთაშორისო ასამბლეის ჩატარებას ქართველი დეპუტატები, სხვადასხვა ოპოზიციის წევრები და ლიდერები და მმართველი პარტია ესწრებოდა. ბევრისთვის მოულოდნელი აღმოჩნდა ასამბლეაზე რუსეთის დუმის დეპუტატის, კომუნისტური პარტიის წევრის სერგეი გავრილოვის გამოჩენა, რომელსაც სპიკერის სავარძელი დაუთმეს. ფაქტს მყისიერი რეაგირება მოყვა ოპოზიციის სხვადასხვა პარტიის წევრებისა და ლიდერების მხრიდან და შეძახილებითა და წყლის შესხმის მცდელობით გახადეს იძულებული რუსი დეპუტატი, რომ პარლამენტი დაეტოვებინა.

მომხდარს ხალხის მხრიდან მძაფრი რეაქცია მოყვა და მმართველი გუნდი დიდ შეცდომაში დაადანაშაულეს. რუსეთი ოკუპანტია! რუსეთი კლავს! მსგავსი ლოზუნგებით პარლამენტის წინ მოსახლეობის მხრიდან, მშვიდობიანი საპროტესტო აქცია გაიმართა. აქციის მიზანი იყო მინისტრების - ირაკლი კობახიძის, გიორგი გახარიასა და ზაქარია ქუცნაშვილის გადადგომა, რადგან, სწორედ მათი ორგანიზებით მოხდა რუსი დეპუტატის- სერგეი გავრილოვის პარლამენტში "საპატიო სავარძელში" დაჯდომა, რაც მათი მხრიდან სრულიად უგუნურობა იყო.

მმართველი გუნდის, "ქართული ოცნების" მხრიდან უპასუხისმგებლო მიდგომამ, რომ ხალხის წინაშე გამოსულიყო, მოესმინა მათი მოთხოვნები და პასუხისგებაში მიეცა დამნაშავე, რომელმაც გამოიწვია საქართველოს მოსახლეობის გაღიზიანება, მშვიდობიანი საპროტესტო აქცია ძალიან მალე ომის ფრონტად აქცია. აქტივისტებმა მმართველ გუნდს ერთი საათი მისცა იმისათვის, რომ პასუხი ეგოთ და ზემო ხსენებულ მინისტრებს და დეპუტატს თანამდებობები დაეტოვებინათ, თუმცა სახელმწიფოს მხრიდან სრული იგნორი ძალიან მალე დაპირისპირებაში გადაიზარდა. შსს-მ შეიარაღებული სპეციალური რაზმის წევრები, სამართალდამცავები და სხვა ძალა გამოიყენა და მშვიდობიანი აქციის მონაწილეები, რომელთაგან უმეტესობა ახალგაზრდები და სტუდენტები იყვნენ, წიწაკიანი მხუთავი გაზით, რეზინისა და სხვა (ფოლადის და უფრო ძლიერი რეზინის ტყვიებით) ძალით, ხელკეტებითა და მოგვიანებით წყლის ჭავლით დაარბია.

არიან დაშავებულები, ადგილზე წინასწარ იყო მობილიზებული სასწრაფო დამხარების რამდენიმე ეკიპაჟი. დაშავებულები კი თბილისის სხვადასხვა საავადმყოფოში გადაიყვანეს. ორმა ახალგაზრდამ თვალი დაკარგა, ზოგს ნეიროქირურგიული ჩარევა დასჭირდა, ერთ-ერთი დაშავებული ამ დრომდე მართვითი სუნთქვის აპარატზე იმყოფება, რამდენიმე ათეულმა კი მიიღო მწვავე დაზიანება. სპეცრაზმელების მხრიდან მოქალაქეებზე თავდასხმა იყო ძალაუფლების გადამეტება და სრულიად მოკლებული ადამიანურ მოპყრობას, რასაც არაერთი მასალა თუ ფოტო მოწმობს. "მთავრობა დიდი სისასტიკით მოექცა თავის მოსახლეობას".

პროტესტი დილამდე, აქტივისტების დევნით გაგრძელდა. დაკავებულია 305 ახალგაზრდა, რომელთაგან უმეტესობას 12-15 დღით პატიმრობა მიესაჯა.

21 ივნისს, 19:00 საათზე მშვიდობიანი საპროტესტო აქცია კვლავ განახლდა. ამჯერად კიდევ მეტი ადამიანი მივიდა და მათი მოთხოვნა კვლავ ძალაშია - დაინიშნოს ვადამდელი საპარლამენტო არჩევნები და გადადგეს გიორგი გახარია, ვინაიდან, მხოლოდ 24 საათის შემდეგ ქუცნაშვილმა და კობახიძემ თანამდებობა დატოვეს.

მომხდარზე არაერთი განცხადება გააკეთა რუსეთმა. რუსეთის პრეზიდენტმა ვლადიმერ პუტინმა რამდენიმე საათის წინ რუსეთის მოქალაქეების უსაფრთხოების მიზნით კრემლში ხელი მოაწერა დოკუმენტს, რომ 8 ივლისიდან რუსულ ავიაკომპანიებს დროებით აეკრძალებათ საქართველოს ტერიტორიაზე ფრენა. რუსმა ტუროპერატორებმაც გააკეთეს განცხადება, რომ დროებით შეაჩერებენ ტურების გაყიდვას საქართველოში. რუსეთის მთავრობა ასევე იზრუნებს იმაზე, რომ რუსი ტურისტები, რომლებიც უკვე იმყოფებიან საქართველოს ტერიტორიაზე, უკან მშვიდობით დააბრუნოს დაუყოვნებლივ და უზრუნველყოს მათი ბარგის ტრანსპორტირებაც. (რაც, ვფიქრობ, რომ საეჭვოა, ტურისტებს საფრთხე ისედაც არ ემუქრებათ და მისი მსგავსი გადაწყვეტილება, ხალხს აეჭვებს!)

"რამდენიმე დღეა რაც ჩამოვედით საქართველოში და რუსთაველთან ახლოს დავსახლდით. გვესმოდა ხმები, ხმაური, თუმცა ჩვენ გარეთ არ გამოვსულვართ, შესაბამისად არაფერი საფრთხე არ შეგვქმნია. დღის მანძილზე კი ქართველ მეგობრებთან ერთად ვსვამდით და დროს ჩვეულებრივ ვატარებდით, არაფერი აგრესია ჩვენს მიმართ, პირიქით, ჩვეულებრივ მიგვიღეს და გვიმასპინძლეს" - ამბობენ რუსი ტურისტები, რომლებიც უკვე რამდენიმე დღეა თბილისში ისვენებენ.