ლეგენდარულ ქართველ ქალ მოჭადრაკეებზე სრულმეტრაჟიანი დოკუმენტური ფილმი გამოვა, ქალებზე, რომლებმაც გასული საუკუნის მეორე ნახევარში მსოფლიო ჭადრაკის სამყაროში ერთპიროვნული ლიდერობა იგდეს ხელთ. ესენი არიან:ნონა გაფრინდაშვილი, ნანა ალექსანდრია, მაია ჩიბურდანიძე და ნანა იოსელიანი.

საქართველოს ეროვნული კინოცენტრი მსურველებს გადასაღებ მოედანზე ეპატიჟება:

"22 აპრილს, 16:30 საათზე, გადასაღებ მოედანზე გეპატიჟებით.

თბილისში სრულმეტრაჟიანი დოკუმენტური ფილმის, “შეხვედრა” (სამუშაო სახელი) გადაღება დაიწყო, რომელიც ოთხი ქართველი მოჭადრაკე ქალის – ნონა გაფრინდაშვილის, ნანა ალექსანდრიას, მაია ჩიბურდანიძისა და ნანა იოსელიანის ცხოვრებაზე მოგვითხრობს.

ოპერატორია: სებასტიან ტალერი, ხმის ოპერატორი: ირაკლი ივანიშვილი და ლაზარ ჟივანაცი, ხოლო კომპოზიტორი: ალექსანდრა ვრებალოვი.

ფილმის გადაღება 13 აპრილს როდოსში დაიწყო და 2019 წლის შემოდგომაზე დასრულდება.

შეგახსენებთ ოთხი ლეგენდარული მოჭარდაკის ტიტულებს:

ნონა გაფრინდაშვილი- მსოფლიოს ხუთგზის ჩემპიონი (1962-1978). 11 გუნდური და 9 პირადი ოლიმპიური ოქროს მფლობელი, ნონა გაფრინდაშვილი გახდა პირველი ქალი მოჭადრაკეა მსოფლიოში, ვისაც დიდოსტატის წოდება მიენიჭა ვაჟთა შორის.

მაია ჩიბურდანიძე:მსოფლიოს ხუთგზის ჩემპიონი ქალთა შორის, 9-გზის ოლიმპიური ჩემპიონი და 3-გზის ვიცე-ჩემპიონი.

ნანა იოსელიანი:საერთაშორისო დიდოსტატი, ხუთგზის ოლიმპიური ჩემპიონი, ორგზის ევროპის ჩემპიონი.

ნანა ალექსანდრია:დიდოსტატი, საჭადრაკო ოლიმპიადის ორგზის და ევროპის ჩემპიონატთა თასი გამარჯვებული, მსოფლიო ჩემპიონატის მესამე პრიზიორი, მრავალი საერთაშორისო ტურნირის გამარჯვებული.