მოსკოვში სპეცრაზმელებმა შტურმით აიღეს 65 წლის კრიმინალური ავტორიტეტის, მერაბ გოგიას (მელია) ბინა. ძალოვანებს მოუხდათ სპეციალური მოწყობილობების გამოყენება, რათა, სახლში აივნიდან შესულიყვნენ.

"სწრაფი რეაგირების სპეცდანიშნულების მებრძოლები იძულებული გახდნენ გამოეყენებინათ არა მთავარი შესასვლელი, არამედ, აივნის შესასვლელი, სადაც ისინი სახურავიდან ჩავიდნენ" - იუწყება "პრაიმკრაიმი." განმარტავენ, რომ კანონიერი ქურდი მხოლოდ უხეში ძალის გამოყენების შემდეგ დაემორჩილა უსაფრთხოების ძალებს და დაწვა იატაკზე.

კრიმინალური ავტორიტეტის ბინაზე თავდასხმისა და ძებნის მიზეზი იყო რუსეთის შინაგან საქმეთა მინისტრის მოადგილის გადაწყვეტილება. მან მისი ყოფნა რუსეთის ტერიტორიაზე არასასურველად ჩათვალა. კანონიერი ქურდი მოათავსეს უცხოელი მოქალაქეების დროებითი დაკავების ცენტრში. ის იქ დარჩება იქამდე, ვიდრე არ მოხდება მისი დეპორტაცია. მერაბ გოგიას რუსეთის მოქალაქეობა 2019 წლის თებერვლის დასაწყისში გაუუქმდა.

კანონიერი ქურდის ჩხრეკის დროს უსაფრთხოების ძალებმა რამდენიმე პასპორტი აღმოაჩინეს.

მერაბ გოგია რუსეთში კრიმინალური გარემოს ერთ-ერთი ყველაზე გავლენიანი წარმომადგენელია. მერაბ გოგია მონაწილეობდა კანონიერი ქურდების შეხვედრაში, სადაც დააკავეს რუსული "ქურდული მოძრაობის" ლიდერი იური ფიჩუგინი (პიჩუგა). გოგია ცნობილია ასევე, თავის ყოფილ მეგობართან, ტარიელ ონიანთან (ტარო) დაპირისპირებით.