დღეს ბატონი ბიძინა ივანიშვილის დაბადების დღეა! უდიდესი სიყვარული და პატივისცემა ამ დიდებული ადამიანისა ძალას მაძლევს, გავთამამდე და ეს დღესასწაული მივულოცო.
დარწმუნებული ვარ, საქვეყნოდ ცნობილი მოღვაწეებისა და მჭევრმეტყველების ფონზე, რომლებიც მას პირადად ულოცავენ, ბარათებს, ლექსებს, მილოცვებსა და საჩუქრებს უგზავნიან, მე მართლაც ვერაფერს ვიტყვი ისეთს, მას რომ ეკადრება. ნურც კადნიერებად ჩამითვლით, უბრალოდ, უდიდესი სურვილი მაქვს, მადლერება გამოვხატო მისი უანგარო ქველმოქმედების, ჩვენი ქვეყნისა და ხალხისთვის გაღებული ღვაწლისათვის. იმიტომ, რომ მისი ამ მოღვაწეობის, ამ თავგანწირვის გარეშე, ალბათ სრულად დავკარგავდით სამშობლოს და მისი „მოვლის“ უზენაეს გრძნობას!
ქედს ვიხრი მისი სიკეთის, წრფელი გულის, უდიდესი მამულიშვილობის წინაშე, ვუსურვებ ყველა სიკეთეს, რაც უფალმა მოჰმადლა ადამიანს და დღეგრძელობას ვუსურვებ მის მშვენიერ ოჯახთან და დიდებულ ქვეყანასთან ერთად.
ცნობილ ადამიანებზე თითქმის ყველას თავისი აზრი აქვს. ვფიქრობ ბევრ ჩვენგანს ჰყავს წარმოდგენაში „თავისი“ ბიძინა ივანიშვილი. ჩემთვის იგი „ჭონაზე“ თანატოლებთან მომღერალი, ბრწყინვალე აღდგომის მახარობელი გულწრფელი ბიჭია, რომელმაც ძალიან კარგად იცის, რომ ხანდახან „უშეცდომოდ“ ვერ მღერის საგალობელს, მაგრამ მისი სიხარული და მონდომება იმდენად დიდია და მისი გული იმდენად წრფელი, იგი იმდენად უყვარს უფალს, რომ „დიდობაში“ ამ გულის გულის გამო, საქართველოს პატრიარქის ლოცვა კურთხევით, წმიდა სამების საკათედრო ტაძარს ააშენებს და ქვეყნის მომავალსაც წაღმა შემოაბრუნებს...

მან ზუსტად იცის, რომ „უფალი მეფობს!“. უსაზღვროდ უყვარს სამშობლო, პატრიარქი, თანამოძმე... იმდენად უსაზღვროდ, რომ ამ რამდენიმე წლის წინ უზრუნველი ცხოვრება, საკუთარი სიცოცხლე და თავისი ოჯახის მომავალი ქვეყნის მომავლის სამსხვერპლოზე მიიტანა. რითაც კიდევ ერთხელ შეგვახსენა, რომ თუ ადამიანს სამშობლო არ აქვს, მას არც სიმდიდრე, არც ოჯახი და არც სიცოცხლე არაფრად უღირს.
და თუ ხანდახან დიდი სიყვარული და ამ სიყვარულით ადიდებული გული ყველას მოსაწონად, ყველას გასაგებად ვერ ათქმევინებს სათქმელს, რისხვის ღრუბელს ნუ შევყრით, ერთი ქათველი პოეტისა არ იყოს, არც ის არის წმინდა გიორგი, რომ მუდამ თეთრ ცხენზე იჯდეს შუბშემართული!
დაბადების დღეს ვულოცავ ბატონ ბიძინას!
წმიდა სამების მადლი ჰფარავდეს მას და მის ოჯახს!